Ngonini anga en mati

(The Eagle and His Friend)


Ngonini, a bigi.
Ne a taki, “Oho, mati, weee, we mi e kisi babun. We babun, mi e kisi babun, da na babun mi e nyan. Tide a babun mi nyan.”

A taki, “Ooo, ai mati, a babun i nyan tide?”

A taki, “Aa.”

A taki, “Oho. We mi seefi, mati, tide, san mi nyan na makonkon.”

Ne a taki, “O, mati oho, na makonkon i nyan?”

Ne a taki, “Ai a makonkon mi nyan.”

Taki, “O, wee, hn, aai mati, oho, we mi nyan babun. Ne i taki i nyan makonkon.” A taki, “We mati, we fa i e lafu?”

Ne a taki, “We a di mi si a switimofu di mi nyan na gaan switi mofu bika babun bigi. Ma makonkon, we mi á sa pe fu makonkon fu nyan.”

Ne a taki, “O we i á mu lafu. Ngonini, mati ngonini i kisi i babun, ne en i nyan. I bee fuu. Te i bee fuu, a fuu a fuu. Mi kitikooma kisi mi makonkon, mi nyan, mi bee fuu, a fuu a fuu. Bee fuu ná a' (abi) tu. I nyan, i babun, i bee fuu a fuu a fuu. Mi makonkon, m' bee fuu, a fuu a fuu.”

Kitikooma, ne a o teli en nen, taki, “Mi kitikooma daunsu, naki taa febwade. A ini wan man e nyan ne en nangaa tapu. I kisi i babun, i nyan i bee fuu a fuu a fuu. Mi kisi makonkon, mi nyan m' bee fuu a fuu a fuu. Da kitikooma daunsu, na ibii man e nyan ne en nangaa tapu. A sa i nangaa e kisi, ne en i nyan. A san mi nangaa e kisi, ne en mi nyan. Da i na gaan gaan man. I bigi de gaan gaan man. Sa i nangaa kisi ne en i e nyan. A san mi seefi nangaa kisi ne en mi e nyan tu. Da i á mu fende taki, san di i nyan, i nyan babun i nyan bigi, mi nyan makonkon mi nyan nyoni. A kitikooma daunsu, da ini man e nyan ne en nangaa tapu. Dati a so a toli taki. Ngonini, anga en mati, a so den ben taki a toli.”