Anansi nanga bigi brada Tigri

Anansi ben didon ini en amaka e hari en baka. Ne Bigi brada Tigri kon doro. A bari: "Anansi, na yu kiri mi brada! Mi kon dya fu kon nyan yu." Anansi dyompo opo. A taki: "Brada Tigri, san yu e taki dape. Mi no sabi noti. Ala ten mi didon ini mi amaka e hari mi baka. Dan oten mi kiri yu brada? Ma efu yu wani, dan meki un ori wan strei?" Tigri taki: "Anansi, mi no lobi fa yu e lei so. Mi o libi yu disi leisi, ma yu kan sabi taki mi ai de na yu tapu." Anansi taki: "Yere dya, brada Tigri, no gi mi pori nen so. Kon meki wi ori wan strei taki suma kofu moro tranga?" Tigri taki: A bun, mi sa ori na strei nanga yu. Ma yere, yu fosi e kon naki mi na mi oso te musdei mamanten. Ma te a Kakafowru bari dan mamanten opo kba, dan yu no mag fu naki mi moro."
Dan Anansi lon go na Temreman oso go leni wan kodya.Dan fosi a Kakafowru bari, Anansi doro na Tigri oso kba. A kari Tigri. Fa Tigri opo na doro, a naki en wan kodya na en fesede. Tigri ori en ede. A taki: "Na mati Anansi kofu hebi so?."
Dan Anansi go na mati Dia. A taigi en taki: "Mi mati mi ede e hati mi so. Kon sribi nanga mi tide neti, bika tide neti mati Tigri o tyari stimofo gi mi." Dia no draidrai a teki en pasi go sribi nanga Anansi. Mamanten Tigri kon. A kari Anansi. Dan fa Dia opo na doro, Tigri naki en wan kofu. Dia fadon dede so pi. So Anansi teki Dia poti en tapu brabakoto. Dan a tra mamanten Anansi go na Tigri. A taki: "Brada Tigri, mi de ete. Mi kon naki yu wan tra kofu baka." Tigri skreki taki ai beifi. Bika a ben denki taki Anansi dede kba. Tigri taki nanga ensrefi: "Disi leisi a boi Anansi disi o kiri mi." Ma a teki dek`ati dan a opo a doro. A srefi momenti dati Anansi naki Tigri wan kodya baka taki Tigri fadon na gron. Nomo Tigri bari: "Mi mama. Na a boi Anansi kofu hebi so?"
Dan wantron Anansi lon go na mati Konkoni fu aksi en meki a kon sribi nanga en. So mamanten di Tigri doro, dan Anansi taigi Konkoni taki: "Mati Konkoni, mi abi tranga korsu now. Mi e begi yu tangitangi fu opo a doro gi brada Tigri gi mi. A tyari meti kon." Konkoni no wani opo go. Anansi begibegi en, ma a no ben wani. Konkoni mandi. A bari: "Mati, san yu e prakseri? Mi a no yu futu boi!" Di Tigri yere a sani dati en ati bron seryusu now. A denki taki na Anansi ben piki en so. A broko a heri doro kon inisei. Konkoni feni okasi fu go kibri. Ma mati Anansi no ben kan du notnoti. Brada Tigri no naki Anansi fu tu sensi. Anansi fadon bib. A dede. So Tigri lon go na en oso. Ma mati Konkoni tan na Anansi oso dan a nyan a Dia meti.
*Esesi fu Anansi meki tigri kisi en.

Anansi nanga Bofru

Anansi no ben abi moni wan dei. Dan a go sidon na wan sei, a taki: "Fa mi sa du fu kon na moni?" A kisi wan prakseri fu go na Bofru, bika Bofru ben de driktoro fu bangi. So Anansi go na Bofru, dan a aksi en efu a kan leni en wan moni. Bofru piki en taki: "Omeni yu abi fanowdu?"
Anansi taki: "Wan hondru dusun golu."
Dan Bofru taigi Anansi taki: "Mi no man gi yu a moni nownowde, ma kon bakadina na mi. Anansi taki: "A bun," dan a gwe. Ma now Anansi no ben taigi Bofru taki, te ai kon teki a moni, a o tyari wan baskita gi Bofru fu a ori gi en. So Anansi teki karu nanga aleisi nanga asisi, dan a poti den ini a baskita, dan a tapu en. Di a go bakadina na Bofru, a kisi a hondru dusun golu, dan Anansi gi Bofru a baskita. Sondro fu taki wan wortu moro fara Anansi gwe.
So, di Anansi tyari a moni baka gi Bofru, a taki: "Yu mus gi mi mi baskita baka." Dan di Bofru tyari a baskita kon, dan Anansi taigi en taki: "Opo a baskita, èn kanti en tapu a tafra meki mi si efu den sani san de na ini no e mankeri." Dan Bofru de so don, a du san Anansi taki. Ne Anansi taki: "Bigin teri, mi mati. Ma efu wan sani mankeri, mi no e go pai yu baka. Bika leki fa yu gi mi a hondru dusun, na dati mi e go gi yu baka. So efu yu teri, dan wan sani e mankeri mi no e gi yu notnoti."
Ne Bofru ati bigin bron. A bigin naki nanga kofu tapu a tafra. A taki: "Anansi, efu mi teri, dan ala sani de yoisti, dan mi e naki yu kiri nanga a postu di de ondro mi tafra dya. Luku dya Anansi, Mi teki a moni disi na bangi. Mi puru en fufuru gi yu!"
Aiten Anansi si fa Bofru e rigeri, a bigin beifi leki wan blad. Ma Anansi teki dek`ati a taki: "Bigin teri, mi mati. Efu yu abi leti dan yu kan du san yu taki." Dan Bofru bigin teri. A teri a karu, a teri a aleisi. Ma now a no man teri a asisi. Nomo Anansi lafu, a taki: "We baya, mi no man yepi yu. Solanga yu no teri omeni asisi de, mi no kan gi yu a moni baka."
A ten dati Bofru e broko dedesweti, bika efu Anansi no pai en a moni baka, dan den e go sroto en. Di a si taki a no man teri a asisi, a fadon dede so brib na fesi Anansi. So Anansi gwe nanga a moni.
*Te yu mati e kori yu a no e lafu.

Anansi nanga Dagu

Anansi nanga Dagu ben sidon e taki tori. Nomo Dagu taki: "Mi no e meki aleisi psa mi."
Ma Anansi no ferstan en. A taki: "Mi mati Dagu, san dati wani taki?"
Dagu taki: "Te wan sma gi yu wan preti nyanyan èn yu no nyan ala, dan a nyanyan san a sma e tyari gi yu a no fu yu. Yu no e si taki te wan sma gi mi nyanyan mi e nyan ala?"
Anansi dyeme. A no e taki noti, ma ai sidon prakseri: "Fa Dagu mofo wroko so?" So a bigin kari Dagu "Mati-pikin-mofo". Ma wan sani ben dangra Anansi taki te den tu e nyan makandra, Dagu e meki tu ipi fu a nyan, dan ai nyan ala. Anansi e prakseri nomo taki: "We, fa Dagu mofo wroko so? Mi no e si na dorosei taki a bigi, ma Dagu e nyan furu.
Nomo Anansi meki den ori wan fesa. Anansi ben kari mati Puspusi tu. So Puspusi kon a yuru di den o nyan. Ala sma ben teki en presi sei a tafra kba. Ma fu di Anansi sabi taki Dagu nanga Puspusi no e feni en nanga makandra, a poti den sidon sei nanga sei.
Fa Puspusi kon sidon na sei Dagu, wantron so Dagu piri en tifi gi Puspusi. Na so fasi Anansi kon si fa Dagu mofo bigi.
Ne Anansi taki: "Ai, mi mati Dagu, na fu soso mi ben kari yu pikin mofo. Now fosi mi kon si fa yu mofo wroko. So noti moro mi sa nyan nanga yu makandra. Tangi fu Puspusi meki mi kon sabi taki na so yu mofo wroko."
Dagu ben syen sote taki a lon gwe. Dati meki te Puspusi nanga Dagu e kon na fesi wan preti nyanyan, dan Dagu e piri tifi gi Puspusi.
*Te yu abi pasensi yu sa si mira bere.

Anansi nanga Sinsin

Anansi nanga Sinsin ben de tu bigi mati. Den tu mati disi ben wroko makandra. Dan te a wan no man moro, dan a trawan e yepi a trawan.
We, now den ben prani karu. Ma den karu fu Sinsin ben kon moro moi leki den di fu Anansi. Dan so Anansi kon kisi bigi-ai. A ben wani den karu fu Sinsin. So a taigi Sinsin taki: "San! Den karu fu yu moi, ma di fu mi moro moi. Luku, efu den karu fu mi ben de leki den wan fu yu, dan mi bo koti den meki den kon moro moi."
Ma Anansi kori Sinsin. Bika te yu koti karu, a no e gro moro. So Sinsin go koti a karu. Di sma ben psa te bakadina, den aksi Sinsin: "Fu sanede yu koti a karu. So moimoi karu yu ben abi. San kisi yu so?"
Ne a piki den sma taki: "Na Anansi taigi mi taki mi musu koti den karu, dan na so wan fasi den o kon moro moi."
Den sma seki den ede. Den taki: "Fa yu don so. Te yu koti karu a no e gro moro. Na te yu prani den ai, dan fosi yu e kisi tra karu." Dan so den sma waka gwe.
Sinsin sidon e prakseri. A taki: "Anansi kisi mi, ma mi o kisi en nanga en mama."
A tra dei Sinsin lon go suku wroko. So a kon feni moni dan a bai wan tu wrokosani soleki tyapu, aksi, owru nanga wrokokrosi. Dan a moni san ben tan abra a poti ini wan saka. Dan a go na en mama. A taki: "Mi mama, mi o taki dati yu dede. Dan yu mus go kibri na sodro. Mi o meki wan kisi dan mi o du leki mi o beri yu. Dan te mi e krei dan yu mus iti wan tu sani gi mi san mi o gi." En mama no drai moro a du leki fa a taki.
So Sinsin seni boskopu na alasei taki en mama dede. Na a beri dei dan Anansi kon doro. Sinsin ben poti ala den sani san en mama ben mus fringi gi en ini a olo nanga en mama. So di den bo tapu a olo, dan Sinsin bigin krei. A taki: "Ai, mi mama, yu e gwe. Yu no libi noti gi mi na baka. Yu no libi wan aksi srefi gi yu boi. No wan wrokosani mi no abi." Dan a srefi momenti dati en mama iti ala den wrokosani wan fru wan kon gi en.
Anansi e luku. Wantron a ben winsi taki en mama ben dede, fu a ben kisi sani tu. Ma Sinsin krei moro tranga. A taki: "Mi mama, now mi no abi notnoti fu nyan, ma mi e begi yu moni fu mi no dede fu angri." So wantron en mama iti a saka nanga moni kon. Anansi ai koti faya. So den man kon tapu a olo dan ala sma gwe.
So, sensi baka a beri fu Sinsin mama, dan Anansi e meki trobi ala dei nanga en mama. Dan a ben taigi en mama taki: "Yu no kan dede leki fa Sinsin mama dede?" Wan dei Anansi nanga en mama ben kisi hebi trobi. Anansi no kon nanga wan weri, a teki wan tiki dan a naki en mama kiri. A seni boskupu gi alasma taki en mama dede èn taki a o beri en mama tamara bakadina. Di den poti a kisi ini a olo, dan Anansi bigin krei leki fa Sinsin ben krei. Ma a no kisi notnoti. Den tapu a olo dan alasma gwe.
Dan baka wan wiki dan Sinsin nanga en mama go na gron. Dan baka wan pisten Anansi koiri kon. Anansi skreki. A taki: "Wakti. Mati Sinsin, a no yu mama de drape?"
Sinsin piki en taki: "Ai, mati Anansi. Na mi mama de drape. Yu ben kori mi nanga mi karu, dan mi koiri yu nanga mi mama. Yu abi tumsi bigi-ai."
Di Anansi yere san Sinsin taki a lon go na en mama grebi. Ai krei nomo fu aksi en mama fu kon na libi baka, ma a tan dede.

Anansi nanga Smetiman

Wan mamanten fruku alen ben kon finifini. Dan Anansi ben kon psa Smetiman oso. Di a yere sani e naki, dan a lon go kibri dape. Dan na ini krapatongo, Anansi taki: "Af uy nat?" (fa yu tan)
A smetiman san no ben abi maniri taki: "Yu blaka keskesi yu. Yu dagu yu!"
Anansi taki baka: "Hmmmmm! Nas im ud uy?" ("San mi du yu"?)
A smetiman taki: "No aksi mi noti. Mi e teki a faya isri disi, dan mi e fon yu, broko yu bakasei."
Anansi taki: "San mi du yu, mi brada?"
A smetiman taki: "Frek! Mi a no yu brada! Gwe! San yu wani dyaso?"
Anansi taki: "We, mi brada, di mi ben waka e kon, dan mi ben yere fa yu ben naki a isiri nanga yu ambra. Ai dyersi taki na poku e prei. San yu wani yu kan taki, ma yu de wan bun smetiman. A winsi fa a wroko hebi so, yu e du en. Srefi wan masyin no man psa yu.
A smetiman ede kon gro di a yere san Anansi taki. A smetiman taki: "Mi heri famiri na smetiman." Dan a teki wan pisi isri dan a sori Anansi ini en fesi. Anansi lon go kibri bika a ben frede. A smetiman taki: "Ala kron isri drat san de, mi e naki kon let' opu. So, no wan wroko de di mi no kan meki."
Anansi taki: "Yu e lei!"
A smetman ati kon bron now. A taki: "Yu wan strei nanga mi!"
Anansi taki: "Ai."
Dan Anansi trusu en anu go ondro en kamisa. Dan a hari wan pisi wiwiri fu en bowtu puru, dan a poti en gi a smetiman fu a naki en kon let'opu. A smetiman e naki, ai naki: Bambambam, kenken, bambambam. Ma a no man kisi a wiwiri kon let'opu. O moro ai naki a wiwiri, o moro a wiwiri e kon kron nomo.
Anansi taki: "Yu si srefi taki mi wini yu. Dan san yu e gi mi?"
A smetiman teki a faya isri trowe tapu Anansi. Ma a no kisi Anansi. Anansi lon go kibri ini wan postu olo. Dati meki te tide yu kan feni Anansi ini smeti-oso.
*Yu e prei nanga faya.

Anansi nanga Tigri

Anansi ben go temre na wan oso. Ma fa Anansi e temre so, dan mati Tigri e koiri kon. Dan Tigri begi Anansi efu a no kan teki wan fu en pikin fu leri en wroko. Anansi taki: "A bun."
A tra dei Tigri tyari en pikin kon gi Anansi, dan a gwe. Dan Anansi meki a pikin Tigri kren go te na tapusei fu a oso. Anansi du leki ai teki wan sani, dan a pusu a pikin Tigri fadon broko en futu. Dan di a pikin Tigri go na oso, a taigi en papa taki na Anansi ben pusu en. Pa Tigri taki: "Mi o leri Anansi wan sani te mi miti en!"
Ma Anansi ben go kibri. Dan a tra dei Anansi nanga Pa Tigri kon miti na pasi. Tigri lon grabu Anansi na en empi. A taki: "Anansi, a no yu pusu mi pikin broko en futu?"
Anansi bari: "Pa Tigri, lusu mi. A no mi pusu yu pikin. Yu no si taki mi na wan smetiman? Yu mu go aksi a temreman Anansi."
Nomo Tigri aksi Anansi: "Fa yu e smeti?"
Anansi taki: "Lusu mi, dan mi sa sori yu fa mi e smeti."
Nomo Anansi tyari en go na a presi pe a ben smeti. Anansi meki faya. Dan Anansi teki wan isritiki, dan a taigi Tigri taki: "Mi o meki disi kon redi. Dan te a redi, dan mi o sori yu fa den e smeti."
Tigri e luku nomo. Ma fosi a isri ben kon redi dan wan hebi alen fadon taki Tigri kon nati. Baka a alen dan Tigri taigi Anansi taki: "Mi e kowru now."
Anansi aksi en taki: "Mi no kan waran yu nanga a isri?"
Tigri taki: "A bun."
Anansi taki: "We Tigri, yu mus drai yu bakasei kon gi mi, dan yu heri skin o kon waran." Tigri drai en bakasei gi Anansi. Ma a isritiki ben kon faya redi kba. Dan Anansi no kon nanga wan weri, a sutu a faya isritiki go esi na ini Tigri bakasei. Tigri no ben man bari srefi. A fadon dede. We, Tigri noti e leri ondrofeni nanga Anansi.
*A pikin tonton san yu prakseri, no e furu yu bere. Luku bun dati a no benawtu yu.

Anansi nanga Tigri

Wan dei Ma Tigri feni wan kronto. Dan leki fa ai waka gwe, so Anansi kon doro. Dan a gi Anansi a kronto. Anansi now waka gwe. Dan tapu pasi a kon si Ba Tigri e waka e kon. So Anansi broko a kronto, dan a bigin nyan en. Di Tigri doro, a aksi Anansi: "San yu e nyan so?"
Anansi piki en taki: "Na wan pisi fu mi koko mi e nyan so."
Tigri taki: "Tan Anansi! San psa so dati yu koko switi so?"
Anansi taki: "We, Ba Tigri, fa di fu yu bigi èn fatu so, a sa musu fu moro switi!"
Dan Tigri aksi Anansi: "We, fa mi sa broko di fu mi, fu mi kan nyan en?"
"Waka kon na tapu a uku, ba Tigri", Anansi taki. Dan Anansi tyari Tigri go na ini wan oso. Anansi teki wan bigi mokro. A taki: "Ba Tigri, go didon." So fa Tigri go didon, Anansi naki en wan mokro broko en koko. Dan wanten Tigri dede.
Dan a tra dei dan Anansi feni wan godo nanga oni. Dan baka wan pisten a kon miti nanga Tigri brada. Dan Tigri brada taki: "A no yu kiri mi brada?"
Anansi seki en ede. A taki: "Nono!"
Dan Tigri brada aksi en: "San yu e dringi dan?"
Anansi piki en taki: "Na a pisi fu pikin Keskesi mi e dringi."
Dan brada Tigri taki: "Gi mi dya meki mi tesi." Di a dringi a taki: "San, na so pikin Keskesi pisi switi! Dan fa mi kan kisi pikinso pisi fu Keskesi?"
Anansi taki: "Kon meki mi tyari yu go na a kriki dat'sei. Dan dape yu sa si furu Keskesi, dan un sa kisi wan."
Na so Tigri nanga Anansi go, dan den kisi wan Keskesi. Den ori en te a tra dei. Dan Tigri taki: "We, Keskesi, mi no o kiri yu, ma yu mus pisi pikinso gi mi."
A Keskesi pisi. Dan di Tigri tesi, a no ben switi leki a wan di Anansi ben gi en. Dan Tigri taki krasi fasi: "Boi, pisi na srefi pisi, noso mi e go kiri yu!" So Keskesi pisi te ai pisi brudu. A no man kisi na switi tesi.
So Anansi di ben gwe, kon doro. Dan Anansi taki: "Brada Tigri, Keskesi no pisi gi yu ete. Mi sa taigi en meki a pisi gi yu." Dan Anansi taigi Keskesi: "Yu mu tyala, dan mi o go tyubun!"
Tigri taki: "San yu taigi en dape?"
Anansi taki: "Mi taigi en taki meki a pisi gi yu. Ma mi e begi yu fu yu lusu en pikinso meki a kisi ensrefi." We fa
Tigri lusu Keskesi, so Keskesi lon gwe. Nomo Anansi dukrun go ondro watra.

Anansi nanga Walfisi

Anansi go na ondro watra. Di a si Walfisi dan a aksi en efu a no wani ori wan strei nanga en fu luku suma e hari moro tranga. Walfisi ben feni en bun. Dan Anansi kon na syoro. A go teki wan titei dan a go na Asaw san ben sidon na seisei e teki winti. A taigi Asaw: "Luku dya, mi e go nownow ondro watra. Meki un tai unsrefi fu si suma e hari moro tranga." Asaw ben de fu na plei.
So Anansi tai a wan sei fu a titei na Asaw neki, dan a go ondro watra. Dan a tai a tra sei na a tere fu Walfisi. So Anansi no tai ensrefi na a titei bika a ben sabi taki a no bo man hari no wan fu den tu.
Dan Anansi du leki ai hari. So Asaw nanga Walfisi e hari densrefi nomo. Den hari densrefi sote taki Anansi ben lafu den na seisei. Den no ben sabi srefsrefi san Anansi ben du.
Ma di den e hari densrefi so, dan ala tu ben kisi a srefi prakseri taki: "Na Anansi tranga so?" So den ari densrefi so, te leki den kon weri. Ma now Walfisi kon kisi wan okasi fu opo en ede kon na syoro. Nomo a kon si taki a no Anansi a ben hari ma na Asaw. Sofasi nomo den ben kan lusu densrefi.
Anansi lafu den te, a kon gwe. Walfisi taki: "Now fosi mi kon si taki ala ten Anansi ben ori mi na spotu. Baya, Anansi na wan koni meti. Yu mus sabi fu prei nanga en."

Anansi nanga wipi

Anansi ben feni wan wipi na sei pasi. Dan a tyari en go na en oso. Ma te yu e taigi a wipi: "Mi wipi, opo!", dan wan tafra nanga ala sortu nyanyan e kon. Ma Anansi no ben wani meki en pikin nanga en frow sabi san a feni. Dan so a ben go nyan tapu sodro. Te en bere kon furu, dan ai saka kon na gron.
Ma wan dei wan fu en pikin go kibri luku san ai du. Dan so a wan pikin go teki ala den trawan kon, dan den go nyan span den bere na sodro. Di Anansi kon na oso a ben sabi dati den ben go na a wipi. Anansi ati bron. A no piki den no wan wortu. A gi a wipi a nen fu Krawasi. Anansi nyan en bere furu. Ma wan fu den boi si san en papa du.
A tra dei ala den pikin nanga den mama go nyan na Krawasi. Di Anansi kon na oso, en ati bron. A ben sabi taki den ben go baka na en wipi. So Anansi taki safri nanga a tiki dati no wan sma ben sabi san a ben taigi a tiki. So a tra dei, fa den pikin taki: "Krawasi, opo!", dan wantron a wipi bigin fon den.
*Ala dei a no sonde.

Anansi tron wan fri sma

Anansi ben de wan srafu. Ma now en mama no ben wani bai en puru leki wan fri sma, bikasi a ben ogri tumsi. Wan dei dan Anansi prakseri taki: "Mi e go suku wan fasi fu meki mi mama bai mi."
Dan so Anansi weri wan weti yapon nanga frei. Dan neti yuru a go ini a kamra pe en mama ben e didon sribi. Dan di en mama si a engel, a. Dan Anansi taki: "No skreki. Mi na engel Gabriel. Gado seni mi kon fu taigi Ma Akuba taki a musu bai en boi puru leki srafu. Dan so Ma Akuba sa kisi wan bun presi na hemel." Dan Anansi frei gwe.
Dan Ma Akuba fadon go ini wan dipi sribi. Dan di a opo, a taki: "Trutru, a engel abi leti."
So Ma Akuba go na en birfrow, dan a ferteri en san a ben si esde neti. Dan birfrow taki: "We, di na engel kon taigi yu so, dan yu musu du so."
So Anansi mama bai en puru leki srafu. Ma te Anansi ben du en ogri go moro fara, dan en mama ben kosi en taki: "Yu denki fu yu bun-ede mi bai yu. Ma na di a engel kon taigi mi taki mi musu bai yu."
Ma now Anansi ben wani bai en wefi puru leki srafu tu. Dan Anansi du leki fa a ben du a fosi leisi, fu prei leki wan engel. Ma Anansi ben abi wan takru kosokoso. So Anansi taigi en mama taki: "Gado seni mi agen baka fu taigi yu taki yu musu du a srefi sani fu bai wan uma gi a boi. Dan so en sa sori yu wan presi pe moni beri."
Ma fa Anansi kba taki, dan wantron a takru kosokoso teki en. Ne en mama taki: "We, a no a sten fu mi boi mi e yere dape?"
Nomo Anansi misi en mofo. A taki: "Mi mama, mi no sa du en moro."
Dan en mama opo a faya. Di a si taki Anansi weri leki wan engel, a taki: "Yu fufuruman! Engel Gabriel, na yu moi so? Kmoto na mi fesi yu takrusani yu!"
Dan Anansi mama teki wan baleta san a ben kibri ondro en bedi. A naki Anansi tu baleta tapu en baka. So Anansi lon gwe. Di mamanten doro en mama bigin kosi ala den sma san ben taigi en taki a ben musu bai en boi.

Anansi wini Domri

Wan dei Anansi go leri fufuru. Dan di a go fufuru na wan man oso, dan a man kisi en ori. Anansi skreki taki a e beifi. Anansi taki: "Nono, meneer. No du mi noti. Disi na a fosi leisi di mi kon fufuru. Mi no sa du en moro."
A man taki: "No span. Yere dya. Domri abi wan linga na en finga. So efu yu fufuru en èn tyari en kon gi mi, dan yu na a moro bun fufuruman san de."
Dan Anansi go nai wan weti yapon nanga frei. Dan, di a weri a yapon, a ben gersi wan engel. Dan neti Anansi go na ini a kerki, dan a leti a faya. Ma domri ben libi leti na abrasei fu a kerki. Di Domri si taki wan faya leti na ini a kerki, a taki: "Meki mi go luku san e psa drape."
Di Domri go na inisei, a si taki wan engel e frei na ini a kerki. Domri skreki taki a fadon go tapu en kindi.
Domri taki: "Suma na yu?" Anansi di ben weri leki wan engel piki taki: "Yu no sabi taki na Gado seni mi kon fu teki yu èn tyari yu go na hemel?"
Dan Domri piki taki: "Dan meki a psa so leki fa Gado wani."
Dan so Anansi poti Domri na ini wan saka. Dan Anansi frei wan eri pisten nanga Domri. Dan baka wan pisten Anansi aksi Domri: "Yu abi wan sani ete di e trobi yu fu go na hemel?"
Domri prakseri go a prakseri kon. A luku na en futu, a luku na en anu. Dan a taki: "Mi abi wan linga na mi finga ete." So Domri puru en linga, dan a gi Anansi a linga. Anansi teki a linga, dan a frei go na Domri oso. Dan a poti Domri ini wan fowrukoi na bakadyari, pe no wan fowru ben de. Dan mamanten di Domri wiki, a yere fa Nene ben taktaki nanga ensrefi. Nomo Domri taki: "Nene, oten yu doro na hemel?"
Nene skreki. Dan di a go luku ini a fowrukoi, a si a saka, dan a opo en. Ne Nene bigin lafu. Nene aksi: "Oten yu doro ini a fowrukoi disi?" Dan Domri ferteri en ala sani san psa. Ma ini a ferteri di a e ferteri, a kon kisi ensrefi taki a no ben de a sten fu wan engel, ma a sten fu Anansi.
Dan Anansi fu en sei ben tyari a linga go gi a man kba. Dan a man teki wan langa wipi. Dan a waka nanga Anansi go na Domri. Dan a man gi Domri en linga baka. Ne den fon Anansi taki te leki a dei fu tide a no man bari.
* Bigi-ai fu Anansi meki don kori en.

Anansi, prapi nanga wipi

Wan dei Anansi go na sei wan kriki, go koti wan bon. Ma dan fa a e koti a bon en aksi fadon go na ini a kriki. Dan Anansi dukrun go teki a aksi. Ma di a de na ondro watra, a feni wan prapi. Dan Anansi kon na syoro, a taki: "San, mi feni wan prapi."
Dan a prapi piki en taki: "Mi a no prapi, ma mi na Gi Tafra."
Dan Anansi taki: "We, Gi Tafra, meki mi si." Dan wantron ala sortu nyanyan kon tapu wan tafra. So Anansi nyan te en bere kon furu. Dan a teki a prapi tyari go na oso.
Di Anansi go na oso, a poti a prapi tapu a sodro fu en. A no meki no wan sma sabi notnoti. Anansi gridi tumsi. En wawan ben wani nyan. Alla dei a ben boro go safsafri go nyan. Te a nyan en bere furu, dan a e saka kon na gron. A e taigi en frow taki a no abi fu gi e nyanyan, bika a no e lostu a nyanyan san a frow bori. Ma en frow no ben sabi notnoti san a ben go du na sodro ala dei.
Ma wan dei di Anansi ben go na sodro fu go nyan, dan wan fu en pikin ben boro safri go luku san en papa e du. A ben kibri na wan bun presi. A si fa Anansi ben taki nanga a prapi, dan wantron nyanyan kon tapu wan tafra pe Anansi e nyan nomo. Ma a no sabi taki wan sma e si san a e du.
Dan a pikin boro safri go taigi en mama. A taki: "Mama, na so wan sani papa e du ala dei tapu sodro. Dan ai taigi yu taki yu no abi fu gi en a nyanyan san yu bori. A e nyan ala dei na tapu sodro. Mi kibri luku en. Owktu mi si san a du."
Ma Akuba taki: "Mi o sori en!"
Dan a tra dei di Anansi ben go wroko, dan en frow nanga den pikin go tapu sodro. Dan a pikin taki nanga a prapi leki fa Anansi ben taki. So, wantron a tafra nanga ala sortu nyanyan kon. Den alamala nyan te den bere furu dan den saka kon na gron.
Di Anansi kon na oso, a wasi dan a go taki nanga a prapi. Di a si noti no e kon, dan a ferstan taki wan sani ben kon psa. Den kon sabi san a ben du. Di a saka kon na gron, en frow fon en nanga wan sisibi tiki, taki a ben abi fu lon gwe.
A tra dei Anansi teki en aksi dan a go baka tapu a srefi presi go kapu wan bon. En aksi fadon go baka ini a watra, dan a dukrun go teki en. Ma disi leisi a no feni wan prapi ma wan tiki. Ma fa Anansi kon nanga a wipi, na so a wipi bigin e wipi en. Anansi bigin e lon, a tiki na en baka e fon en nomo. Di a lon wan pisi dan Anansi bari: "Wipi, tapu!" Wantron na tiki tapu fu fon en.
Dan Anansi tyari a wipi go poti na sodro. Den pikin go kibri luku san den papa ben tyari go poti na loktu, ma den no ben sabi san na a sani.
A tra dei Anansi du leki ai go koiri. Fa Anansi puru en futu fu a oso, na so den pikin lon go na sodro. Dan fa den fasi a wipi, na so a wipi bigin fon den. Den bari te den no man moro. Anansi bari gi a tiki: "Ai, gi den moro! Mi sa puru fufuru gi den, den fufuruman!" Anansi meki a wipi fon den te leki den bowtu kon fini.

Dagu nanga Tigri

So Dagu nanga Tigri ben meki wan barki fu nyan Krabita. Di den kisi Krabita dan den tyari en go na Tigri oso. Dan Dagu poti wan bun bigi patu nanga watra tapu faya, fu te a kon ati moi dan den bo saka Krabita go na ini a watra. So Dagu ben abi na wroko fu go luku efu a watra e kuku. Dan Tigri bo sorgu gi a tra pisi. Dan ala yuru Tigri ben seni Dagu meki a go luku efu a watra faya kba. Te Dagu e drai kon baka dan ai taigi Tigri taki a watra no faya ete. Ma Dagu ben kon sari Krabita now. Dan di Tigri seni Dagu baka, Dagu piki en taki: "A no moro betre efu yu srefi go luku disi leisi." Tigri taki: "A bun."
A yurten di Tigri gwe, dan Dagu kon lusu Krabita. Dan den tya futu gwe. So di Tigri drai kon baka, a si taki den tu meti no ben de fu si. A teki lon na den baka. So, Dagu nanga Krabita lon te den kon doro sei wan kriki. Mati Dagu no ben sabi fa a bo du nanga Krabita, bikasi Krabita no sabi swen. Mati Dagu taki: "We, mi mati, mi o diki wan olo, dan mi o poti yu na ini, dan mi e go tapu en. Ma yu mus libi den tutu fu yu na doro." Dan Dagu du so leki fa a taki. Dan Dagu swen so esi a kan go na abrasei. Fa Dagu doro na abrasei dan Tigri kon doro sei na kriki. Fa Tigri e frede watra a no ben kan du noti. Tigri bari: "Dagu, pe yu poti Krabita?" Dagu piki en: "Mi no sabi. Mi denki taki a sa go na busi. Ma mi papa Tigri, yu ati e bron nanga mi now?" Tigri taki: "Yu boi Dagu, efu mi kisi yu. Dan yu sa si san mi o du nanga yu." Nomo Dagu piki Tigri taki: "We, papa Tigri, efu yu ati e bron trutru nanga mi, dan yu mus teki den tu pisi tiki dape, dan yu e fringi den kon naki mi." Dan so Tigri ko
n moro krasi, a no drai luku moro leki a grabu den tu pisi tiki ori, ma ala dati a ben de Krabita. Dan a fringi en go na tapu Dagu. A yurten Krabita fadon na abrasei, ne fosi Tigri kon si taki na Krabita. Tigri e krei watra ai, ma a no ben man kisi den moro.

Dagu weri Anansi bruku

Wan dei Krabita ben ori wan dansi. Ma Dagu no ben abi bruku fu weri. So a go leni wan bruku. Ma a bruku ben sidon span na Dagu skin. Ma toku a go na a dansi. Ma ala leisi te Dagu e dansi, ai bradi en futu. So Anansi kari en kon na wan sei. A taki: "Dagu, luku bun nanga mi bruku san yu weri."
Dagu e dansi nomo, ai piri en futu baka. Anansi kari en baka kon na wan sei. A taki: "Mati, luku bun nanga mi bruku san yu weri."
Dagu no e yere. Te ai dansi ai piri en futu nomo. Dan Anansi no kon nanga nowan weri, a hari a bruku puru na Dagu skin. Dati meki te nanga a dei fu tide Dagu e waka nanga sososkin.
*Sma sani a no yu sani.

Datra Anansi

Kownu ben abi wan umapikin. A pikin ben siki sote. Someni datra ben luku a pikin, ma no wan fu den ben kan feni wan dresi gi en. Dan Anansi prakseri taki: "Mi e go suku moni na Kownu." Dan Anansi go bai wan blaka paki nanga wan blaka ati. Anansi meki den meki wan syesi gi en. Dan a yuru wan kutsiri. Dan Anansi go na ini a syesi dan a meki a kutsiri tyari en go leti na Kownu mofodoro.
Dan Kownu seni en dinari go luku suma na a sma san kon. Den go taigi Kownu taki na wan datra kon. Di datra kon inisei den tyari en wantron go na a siki umapikin. Di datra luku a pikin moi, a taigi Kownu taki: "A pikin sa kon betre, ma te ala kba."
Ma Kownu no ben sabi san de na ini Anansi ede. So a fosi dei Anansi aksi Kownu wan dusun golu. Kownu gi en a moni. Dan Anansi gi Kownu wan dresi. Dan Anansi taigi Kownu taki a dresi nen: Te noti no de moro.
So Anansi e luku a pikin psa wan yari kba, taki pikinso ete dan ala Kownu moni ben kba. Ma ala leisi te Anansi e kon luku a pikin, ai taigi Kownu taki: "Mi Kownu, yu no abi fu frede. A pikin o kon betre, ma te ala kba. Solanga sani de, mi e gi en a dresi: Te noti no de moro. Dan a sa betre." Dan ala dei Anansi ben aksi Kownu moro furu moni.
Ma wan dei Kownu kon luku a sani bun. A taigi a boriman fu en taki: "Luku! Ala dei datra e kon luku mi pikin, ma mi pikin no e kon betre. Dan datra e taigi mi taki te ala kba dan fosi mi pikin sa kon betre nanga: Te noti no de moro. A sani disi e dangra mi so."
Dan a boriman taigi Kownu taki: "We, te a datra kon baka, dan yu mus aksi en san dati wani taki?"
So Kownu ben wakti Datra. So di datra kon dan Kownu aksi en taki: "Dan oten ala sani sa kba?"
A sani ben de so na Anansi mofo, a taki: "Te Kownu no abi moni moro èn te noti no de moro, dati wan taki na te yu pikin bro koti."
Kownu ai kon bigi. A taki: "We, dan datra yu no abi fu kon moro bikasi toku a pikin no sa kon betre moro." Ma fosi Anansi ben wan kmoto fu a kamra dan wan dinari kon taigi Kownu ini en yesi taki na Anansi ben prei datra. Kownu grabu Anansi ori, dan a koti Anansi wan klap ini en fesi. Dan Kownu meki den wipi Anansi sote taki a yuruten di den lusu en, a no ben sabi pe a mus lon go. Dan Kownu meki den sroto Anansi te leki a kon tron wan granpapa.
*Anansi koni, ma toku ai fasi na lakboru.

Dia nanga Sekrepatu

Dia nanga Sekrepatu ben ori wan streilon. A strei ben de so taki a sma di doro kownu stupu fosi bo kisi a fosi priys. Ma fu di Sekrepatu sabi taki a no man lon a poti tapu ala uku wan Sekrepatu, so ala presi pe Dia e lon a e miti wan sekrepatu. Dia bigin lon moro tranga. Ma tye, poti fu Dia. Di a doro na Kownu stupu a si taki Sekrepatu doro kba. Di Kownu opo en fensre a si taki Sekrepatu doro fosi.
So Sekrepatu kisi a fosi priys. Ala sma ben ferwondru fa Sekrepatu ben wini Dia.

Fa Anansi kisi wan plata baka

Anansi na wan man san lai furu triki èn a prakseri taki en wawan abi ala koni. Ma now, san yu denki psa? Anansi prakseri sote fa ai go libi. A mus fu abi wan sma san ai bedrigi. Dan so a kon tuka nanga Konkoni. A ben de langa kba di en nanga Konkoni no ben miti. So Anansi kari Konkoni kon. Dan a aksi en efu a no wani wan wroko. Konkoni taki: "Ai, mi wani du wan wroko. Ma pe wi o go du a wroko dati?"
Anansi taki: "We luku, Kownu abi wan bigi kasabagron. Ai suku sma fu krin na kasabagron gi en."
Ma Anansi sabi taki te Konkoni doro na wan gron, a e nyan ala sani san a feni. So Anansi prakseri taki: "Efu mi nanga Konkoni e wroko, dan a seti. Te en o puru a nyanyan fu kownu tyari gwe go na en oso fu go seri, dan mi o go konkru, meki den kisi Konkoni." Ma Konkoni srefi koni tu. A sabi sortu dei a e puru en nyanyan tya gwe na en oso.
Dan so, Kownu e krutu ala dei fa en nyanyan e kmoto ini en gron. Ma now Kownu kon aksi Anansi efu a no kan luru a sma gi en di e fufuru ala dei ini a gron. Dan Anansi prakseri taki: "Ai, a leti dyaso mi ben wani yu, Kownu." Bika Kownu ben taki tu taki: "Efu yu feni a fufuruman, dan mi sa gi yu furu moni."
Ma dan now Anansi ben puru moro furu nyanyan na ini a gron e tyari gwe. Ala dei ai tyari saka nanga kasaba, sosrefi saka nanga karu go na en oso.
Ma san yu denki psa now Konkoni e luru Anansi, Anansi e luru Konkoni. Dan wan dei fa yu si Anansi lai den tu saka poti tapu en baka fu tyari gwe, wantron Konkoni bigin bari: "Luku a fufuruman de na ini a gron!" A so den srudati kon kisi Anansi nanga den saka tapu en mindribaka. Dan den srudati fon Anansi tapu en mindribaka te a kon plata. Dati meki un e si tide taki Anansi baka plata.

Gon dede

Wan dei Anansi ben leni wan gon na Ontiman. Dan a seni piki ala den meti taki den mus kon na en, bikasi gon dede èn den o beri en. So ala den meti ben breiti, bika gon na wan takru sani. Na en ben kiri den na ini busi. Na so den ben breiti fu yere taki gon dede.
Dan ala den meti kmoto kon na ala sei fu a busi. Dan Anansi meki den meki wan burikiwagi. Dan a poti a gon tapu a wagi èn Anansi go sidon tapu a gon. Dan Anansi meki den bigin hari a wagi. Dan Anansi meki ala den meti waka baka makandra na fesi a wagi. Dan Anansi e bari: "Wi e go beri a gon tide. No wan meti sa dede moro."
Dan fa den meti e waka baka mankandra, Anansi no draidrai moro. A sutu ala den meti kiri. Dan so Anansi ben abi stimofo fu wan langa ten.

Keskesi

Keskesi ben waka e fufuru karu ini wan gronman dyari. Dan te a nyan ala den karu, dan ai lon go baka na ini a busi. Na so ala dei Keskesi e du, ma a man noiti e kisi en.
Ma wan dei a man seti wan tara popki nanga wan karu ini en anu ini a gron. Dan di Keskesi doro, a no denki moro fara leki a waka go na a popki. Keskesi bigin singi:
"Seni kari man, seni kari bigibasi.
Keti dyompo ini a potyoti.
Tan na maka yamki!
Sneki yu!
Sneki yanki yu!"
So, Keskesi no aksi a tara popki. A taki: "Gi mi a karu dya." Keskesi anu fasi. A taki: "Efu yu no lusu mi, èn yu no gi mi a karu, mi o trapu yu." Keskesi futu fasi. "Dan mi sa skopu yu nanga a tra futu." Dati srefi kon fasi tu. Dan Keskesi hari a popki wan klap nanga a tra anu. Dati kon fasi tu. Ne en ati bigin bron. A taki: "Efu yu no lusu mi now, mi e buku yu nanga mi ede dan mi wan si efu yu no lusu mi." Now Keskesi ede fasi.
Baka wan syatu pisten dan a gronman waka kon. A taki: "Na yu na a fufuruman na ini mi gron?"
Keskesi taki: "Ke, mi mati, mi e begi yu fu lusu mi. Bikasi na angri tyari mi fu kon fufuru dya."
A gronman taki: "Mi mati, bigin fu tide yu no sa abi angri moro." Ne a man fon Keskesi te a kiri en.
* San moro keskesi. A brasa maka.

Lei ati moro soro

Wan dei Anansi go na Kownu. A aksi en: "Kownu, yu wani strei nanga mi? San moro ati? Mi e taki dati lei ati moro soro."
Kownu lafu Anansi. Kownu taki: "San yu sabi Anansi? Yu denki taki mi de den tra meti san yu e ori na spotu. Mi taki dati soro moro ati. Bikasi te yu abi wan soro, na yu heri skin e ati yu."
Anansi taki: "A bun, mi Kownu, yu sa si wan dei."
So a tra neti dan Anansi go na a trapu fu Kownu oso. A saka wan moi bigi pisi kunkun, dan a go kibri ondro a kunkun. Dan mamanten di Kownu e saka en trapu, a taki: "San! Suma kunkun a bigi kukun dya. A sma di du a sani disi sa dede!"
Wantron Kownu seni kari ala sma di e wroko ini en oso, sosrefi en srudati tu. Di den sma doro, Kownu ai kon redi. So ala sma ben kon sabi o fara a ben de. Kownu aksi nanga tranga sten: "Suma du a sani disi?"
Den sma piki taki den no sabi notnoti. Dan a surdati di ben knapu krosbei fu a kukun yere wan sten e taki kmopo fu a kunkun e taki: "Na Kownu du en." A srudati go moro krosbei. A yere a srefi sani. Dan a srudati bari wan bigi lafu.
Kownu ati bron. A bari: "Un teki a surdati dape èn un kiri en wantron!"
A srudati bari: "Primisi mi, Mi Kownu. A kunkun taki dati na Kownu. Kon arki srefi."
Di Kownu kon krosbei, a sten bari so tranga dati ala sma ben yere: "Na Kownu du a sani disi."
Kownu skreki taki a no ben man taki noti. Kownu ben syen taki wantron a kisi wan tranga ede-ati. Den tyari en gwe.
Di wan fu den srafu ben go krin a kunkun, a si Anansi e lafu. A grabu Anansi. A tyari en wantron fesi Kownu. A taki: "Mi Kownu, na Anansi ben kunkun dape de."
Kownu taki: "Anansi, tamara a o kba gi yu. Mi sa meki den anga yu!"
Ne Anansi piki Kownu taki: "We, mi Kownu. Mi no ben taigi yu taki lei ati moro soro!"
Wantron Kownu memre san a ben taigi Anansi a dei na fesi. Ma a sani ben ati Kownu sote. Kownu taki: "Srudati, un tyari en go sroto. Dan so leki fa mi ben taki kba, dan tamara un mus anga en!"
So, neti yuru dan mati Pokai kon luku Anansi. Anansi taki: "Ai, mi mati, na bun tyari yu kon dya. Yere san yu mus du. Tamara mamanten fosi den kiri mi, yu mus go na tapu a bon leti sei Kownu oso. Dan yu e singi a singi disi:
"Un no kiri Anansi,
un no kiri Anansi.
Ala sma sa dede:
Kownu sa dede,
Kownu frow sa dede,
sosrefi Kownu pikin sa dede.
Dan Anansi sa kisi ala sani."
So di mamanten doro, dan Pokai singi a singi san Anansi ben taigi en fu singi. Di Kownu yere a singi, a kon frede. Kownu taki: "Un no kiri Anansi moro, noso wi alamala o dede. Unsrefi yere san a sten e singi kmopo fu loktu." Na so den kon lusu Anansi.
Baka wan yari, dan Anansi go na Kownu baka. A taki: "Mi Kownu, mi sabi taki yu sabi furu. Yu abi someni gudu. Ma san yu e denki fu a sani disi: Lei ati moro soro?"
Kownu taki: "We, Anansi. Mi sabi te nanga now dati soro moro ati. Bikasi te wan soro e ati mi, dan mi heri skin e ati mi. Dan mi no e du noti moro leki mi e go didon sribi. Ma mi wani si fu tru efu dati de tru."
Ma Kownu, efu yu wani strei nanga mi, dan mi wani wan afu pisi fu yu Kownu-kondre nanga wan pisi fu ala yu gudu."
Kownu taki: "Ma efu mi wini yu, dan mi o kiri yu."
Anansi taki: "Dan na soleki fa mi Kownu taki." Ma Kownu no ben prakseri moro fara taki Anansi ben kisi en nanga a srefi sani disi kba. Ma, fosi Anansi gwe a taki: "Kownu, mi wani aksi yu ete wan sani. Yu wani si fa gron e taki?"
Kownu taki: "Iya."
Dan Anansi taki: "Kownu, yu kan bari a nyunsu disi gi ala sma nanga den tra kownu taki: Tamara o de wan bigi dei, bikasi gron e go taki."
So Kownu du soleki fa Anansi taki. Dan neti yuru Anansi meki den pikin fu en go kunkun leti na sei Kownu sturu. Dan a meki den tan drape. Nomo a tra dei fosi Kownu ben doro ini a bigi krutupresi, dan eri dape ben furu nanga libisma. Owktu den tra kownu ben sidon dape tu. Di Kownu go sidon na tapu en sturu a smeri wan tingi sani. Kownu drai luku lontu dan a si fa ala sma ben e masi den fesi èn den ben poti saka-anyisa na den noso. Dan Kownu ai kon fadon tapu a kunkun. Kownu no ben de fu ori moro. Kownu taki: "Pe Anansi de?"
Ne Anansi waka kon. A saki kindi go na gron dan a boigi en ede. A taki: "Iya, mi Kownu, san yu wani?"
Kownu taki: "A no yu du a sani disi?"
Anansi taki: "We, mi Kownu, luku na mindri den tra kownu mi ben de. Ma yere now. Un ben kon dyaso fu kon si fa a gron e taki. Dan mi sa aksi a gron, suma na a sma di du a sani disi."
Kownu bari: "Tya go, Anansi, èn du esesi!"
Ne Anansi waka go na a kunkun. Ala sma e luku now san e go psa. Dan Anansi taki: "Kunkun, Kunkun, suma na a sma san kunkun dya?"
Ne a kunkun piki: "Na Kownu kunkun."
Dan Anansi aksi ete wan leisi: "Kunkun, kunkun, suma du a sani disi?"
Ne a kunkun bari bun tranga: "Na mi Kownu du a sani disi!"
Kownu flaw. Ala sma ben lafu en. Den tyari Kownu gwe. Ma baka wan pisten dan Anansi go na Kownu. A taki: "Mi ben taigi Kownu taki lei ati moro soro. Yu no ben wan yere. Luku dya, na den pikin fu mi ben piki taki na yu ben kunkun. So mi lei gi yu. So yu mus gi mi san yu ben pramisi mi."
Nanga watra-ai Kownu gi Anansi den sani san a ben pramisi en.

Puspusi nanga koki

Puspusi nanga wan koki ben wroko makandra na wan misi. Ma fosi Puspusi ben teki a wroko, a taki dati botro na en bigi trefu. Ma a ben lei. Ma ala dei botro ben lasi na ini a kukru. Dan a misi e kosi a koki taki na en e fufuru a botro.
A no kan de Puspusi bika botro na en trefu.
Ma wan dei a misi seti wan val gi Puspusi, ma a dei dati a no go na a botro. Dorodoro a misi ben kosi a koki taki na en e fufuru na botro. Ma wan dei a koki taigi a misi taki: "Efu yu wan sabi suma na a fufuruman, dan yu mus bai lakseri puiri, dan yu e poti en ini na botro. Dan yu sa si".
Ma now Puspusi no sabi taki lakseripuiri de ini a botro. A nyan a botro so switi. A tamamra mamanten di a kon na wroko dan heri dei en bere ben koti en a no ben man du notinoti.
Dan so a misi kon sabi taki na Puspusi ben fufuru na botro.
Dati meki den bigisma e taki: "Te Kamrawentye nanga Botriman kisi trobi, yu e yere pe na botro go."

Suma kofu moro tranga

Wan dei Anansi nanga Tigri ben waka e koiri. Dan Anansi taigi Tigri taki: "Kon meki un ori wan strei fu luku suma kofu moro tranga."
Tigri taki: "Mati Anansi, fa yu kan denki so wan sani? Efu mi bro winti na yu tapu yu e frei leki wan fowru go na loktu. Kon meki un libi na sani."
Ma Anansi no e yere san Tigri e taigi en. Di a sani kon sari Tigri, a taki: "A bun Anansi. Ma fa un o strei dan?"
Anansi taki: "Ala mamanten, te feifi yuru dan wan fu unu e go na a trawan oso go naki en wan kofu."
A sani gi Tigri fu lafu. So den tu prati pasi. Dan Anansi teki pasi go na wan smeti. Dan a aksi a smeti fu meki wan moi bigi mokro gi en. So a tamara mamanten, Anansi go na Tigri oso. A kari Tigri. Dan fa Tigri opo a doro, Anansi naki en wan mokro. Tigri flei go na inisei. A skreki. A prakseri taki: "San! Na Anansi anu hebi so?"
Dan Anansi lon gwe. A go na mati Konkoni. A taki: "Mi mati, ala mamanten wan sma e tyari nyanyan gi mi. Ma mi no e firi so bun. Mi abi korsu. Na begi mi kon begi yu fu kon sribi nanga mi." So mati Konkoni kon sribi nanga Anansi.
Di mamanten doro, dan Tigri kari Anansi. Dan fa Konkoni opo a doro, na so Tigri naki en wan kofu taki a flaw. Tigri prakseri a ben naki Anansi, so a koiri go safsafri na oso. Anansi kon yepi Konkoni meki a kisi ensrefi. A gi en nyanyan dan a seni en gwe.
A tra mamanten Anansi go na Tigri baka. A kari Tigri. Tigri skreki, bika a fasi fa a ben naki Anansi, Anansi no ben kan kon moro fu naki en baka. Afen, Tigri kon opo a doro. Fa a opo a doro, Anansi naki en wan mokro baka taki a flaw. Di Tigri kisi ensrefi baka, a taki: "A no spotu Anansi kofu tranga so. Ma mi o leri en disi leisi wan sani."
Neti yuru dan Anansi go na Dia. A begi en fa a ben kan kon sribi nanga en, bikasi wan man e tyari ala mamanten fruku nyanyan kon gi en." Di Dia yere nyanyan, a lon kon sribi nanga Anansi.
Mamanten Tigri doro baka. A kari Anansi. Fa Dia opo a doro, a naki Dia smeisi ini wan uku taki Dia ben si stari. Tigri koiri gwe. A taki: "Mi wani si efu Anansi sa kon disi leisi baka."
Anansi meki esesi nyanyan gi Dia. Dia nyan te en bere kon furu. Dan so a kon gwe. So a tra mamanten, Anansi kon fu naki Tigri baka. A kari Tigri. Tigri bigin frede. A bari gi Anansi: "No naki moro. Yu anu hebi moro di fu mi. Luku teki moni dya. Mi e gi yu wini."
Anansi taki: "Kon na doro. Mi no naki yu moro." Ma Anansi sabi taki Tigri no e gi lasi. Nomonomo a bo kiri en. Fa Tigri opo a doro, Anansi naki en kiri.

Tigri nanga Kakafowru

Wan dei angri ben kiri Tigri. Dan tigri waka go suku nyanyan. Nomo Tigri kon doro na wan fowru koi. A si wan moi stampu kaka ini na koi. A koi ben sroto bun steifi, sodati Tigri no ben man opo a doro. Dan Kakafowru bari nomo: "Koko-dia- ko..!"
Di Tigri yere a bari, a taki: "Mi mati Kakafowru, san yu e taki dape?" Kakafowru no piki en noti.
Dan Tigri bigin singi: "Mi wani nyanyan. Mi wani nyanyan. Mi abi wan gowtu moni. Suma wani kenki en fu wan pisi lefre?"
Nomo di Kakafowru yere san Tigri singi, a aksi en taki: "We, fa yu o kisi a lefre?"
Tigri taki: "Opo na doro, dan yu e gi mi wan bosi."
Ma fa a Kakafowru ben don sote, a opo a doro. Fa a langa en mofo fu bosi Tigri, ne Tigri beti en ede kmopo. Na so Kakafowru feni en dede.
*Odo: Na prefuru kiri kafowru.

Tigri prei dede

Wan dei Tigri sidon prakseri wan fasi fu kori den tra meti.
Dan a seni wan boskopu gi ala den meti taki tide neti a o dede.
So tamara den mus kon na en oso fu ori wan dede-oso.
Ma te den e kon dan den no musu singi sari singi, ma den musu singi prisiri singi en den mu dansi.
A dei na baka ala meti ben kisi fu yere taki Tigri dede.
So Krabita ben sabi prei fiool bun èn Dia ben sabi prei gitar. Den bo sorgu fu a poku di den doro dan den bigin prei. Ma Sekrepatu si wantron taki Tigri no dede, ma na kiri a ben wani kiri den alamala. Now Sekrepatu bigin singi: "Mi mati, mi mati, so leki fa un alamala sabi taki yu futu na yu libi, suma no abi futu a mus bigin biten."
Dan Sekrepatu taigi Krabita ini en yesi taki: "Tigri no dede, ma ai luru fu kiri unu."
Dan Krabita teki en fiool baka. A bigin prei dan a bigin singi: "Suma no abi futu, a mus bigin biten. Suma no abi futu, a mus bigin biten."
Krabita tan tiri, dan a bari: "Un lon! Tigri no dede. Fosi Tigri opo, dan ala den meti ben lon go ini a busi kba. Dan Tigri bigin lon baka Krabita. Ma di Krabita lon wan moi pisi, dan a lon go ini wan postu di ben abi wan olo. Dan Krabita sutu en tutu kon na doro. Sofasi Tigri no si pe Krabita go.
Dan Dagu di no ben tnapu farawe taki: "Ba Tigri, efu yu tranga, dan yu musu fringi a tompu dati go na abrasei fu a liba."
So Tigri no drai langalanga. A grabu a tutu fu Krabita dan a fringi en go na abrasei. So di Tigri fringi Krabita go kba na abrasei dan a kon si taki na Krabita. Tigri stampu nanga en futu na gron. Ne Krabita bigin singi gi Tigri: "Gron no e taigi sma sani, sabi diri!"
Tigri ati bron sote taki a kon redi. Dan Dagu singi gi Tigri: "No ati bron so, ba Tigri. Na busikondre wi no e prei so. Yu yesi, yu ai, koni nanga sabi musu de yu basi."
Efu ondrofeni no ben de, sabi diri no ben sa de tu.

Tigri prei dede

Wan dei Tigri prei taki a dede. Ala den meti ben sari sote. Bikasi fosi Tigri ben dede a ben pramisi ala den meti taki a no bo kiri den moro. So wan heri pisten Tigri ben libi den meti nanga rostu. So den kon ori wan dede-oso gi Tigri. Nomo Sekrepatu opo. A no man waka ma ai kroipi.
A bigin e singi: "Mi brada nanga mi sisa, sensi yu de, yu yere taki wan sma dede, dan en bakasei e bro?"
Nomo Sekrepatu taki: "Baya, yu sabi san? Mi e go na doro, go pisi." So Sekrepatu pinapina te a kon na doro, dan a lon esesi gwe.
Konkoni di ben iti en ai go na doro, ben ferstan taki wan sani no bun. A opo. A taki: "Ai, mi pa Tigri. A e hati mi fa yu dede. Ma mi pa Tigri, yu baka e bro ete." Dan Tigri opo en ai pikinso, dan a tapu en baka. Konkoni waka gwe.
Bofru e krei, Tamanuwa nanga Dia e krei. Den tra meti e krei. Nomo Agu opo, a bigin bari krei moro tranga. A taki: Papa Tigri dede, ma en baka e bro ete. San dati wani taki dan?"
Dan bofru taki: "Baya, mi sa kon gwe now." Den trawan du a srefi sani. Ma Agu wawan sidon e krei nomo. Aiten Tigri opo en ai, a si taki ala den meti gwe. Ma Agu wawan ben sidon e krei.
Ne Tigri opo na dede. A fanga pikinso watra-ai fu Agu dan a leki en. Tigri taki: "We Agu, efu yu watra-ai switi so, we, yu meti dan!"
Ne Agu bari, un kon yepi mi. Tigri e kiri mi dya. A no dede. Un kon yepi mi!" Ma a ben lati gi en. Tigri kiri en.
Dan baka wan langa pisten dan Tigri sidon. A no ben abi no wan nyanyan. Angri ben kiri en taki a ben bigin nyan dreiwiwiri. Nomo Tigri prakseri go, a prakseri kon. A taki: "Mi sabi san mi o du now. Mi o taki dati gon dede." So Tigri sukusuku te a kon feni wan gon. Dan a seni piki ala den meti, taki den mus kon na en oso, bikasi gon dede.
Ala den meti ben breiti, bika gon de a moro bigi feyanti fu den. Na en ben kiri den na busi. So di den meti yere a boskopu fu Tigri, den lon go wantron na Tigri oso. Ma ala dati, dan Tigri lai a gon nanga patron kba.
Ma Anansi nanga Konkoni ben sabi a triki fu Tigri. So Anansi ben seni en frow nanga en pikin fu go kibri. Di Anansi doro na Tigri, a taki: "Mi pa Tigri, mi frow nanga den pikin fu mi no kon ete. Ma fa den no abi maniri èn den no abi lespeki gi yu, dan mi e begi yu pardon. Ma di mi abi lespeki gi yu, dan mi sa lon go teki den."
So Anansi kon gwe. A waka miti en frow nanga den pikin dan den lon go kibri farawe ini wan bigi godo. Dan so den wakti Anansi fu kon nanga en frow nanga en pikin. Di Tigri si taki den no e kon a taki: "Un no e go wakti den moro. Bikasi gon musu beri tide." Dan so Tigri taigi den meti taki den musu waka baka makandra na fesi a dede gon.
Ma Konkoni ben sorgu taki a ben doro te na bakasei. Dan a taki: "Ba Tigri, fa mi kan waka esesi, a no moro bun taki mi waka na fesisei?"
Tigri piki en taki: "A bun." Konkoni ben waka te na fesi ma a ben srapu en yesi. Nomo wan fru wan Tigri bigin kiri den meti na baka. Konkoni no ben waka langalanga na fesi ma a ben dyompo dyompo go na wan sei. Dan a ben singi: "Un luku bun! Ba Tigri e go nyan unu."
Tigri no ben yere san Konkoni ben singi. A taki: "Mi mati Konkoni, fu sanede yu no e waka na edesei? Yu e waka e dyompo dyompo. Yu no abi lespeki taki na beri yu de?"
Konkoni taki: "We, mi no kan yepi. Na so mi lobi dyompo dyompo. Yu sabi taki mi na Konkoni, mi e krei fu mi baka neki. Ma mi no sabi fu den trawan, ma mi sa sorgu taki yu no kiri mi.
A yuruten Skapu yere san Konkoni taki, a bari: "Bèè! Bèè! A lon go na busi. Den tra meti srefi lon panya gwe. Ma Tigri no ben wani lon na den baka moro, bika a ben kiri nofo meti kba taki a no ben de fanowdu moro fu go kiri moro. So Tigri bigin nyan den meti wan fru wan.
Dan Konkoni lon go na a presi pe Anansi ben kibri. Dan a taigi en san psa. Anansi taki: "Mi ben sabi taki na dati a bo du. Ma san Tigri e du now?"
Konkoni taki: "Ai sidon nyan den meti san a sutu."
Anansi no ben de fu ori. A mandi. A taki: "Mi o sori Tigri wan sani tide! Kon meki un gwe, mati Konkoni."
So den tu teki pasi go na Ontiman oso. Den taigi Ontiman san Tigri du. Ontiman no kon nanga no wan weri, a teki en gon dan a meki den tyari en go pe Tigri de. Na so a sutu Tigri kiri. So Konkoni, Anansi nanga en frow nanga den pikin nanga Ontiman feni stimofo fu wan langa ten.

Tyotyofowru nanga Tigri

Wan dei Tyotyo go leni moni na Anansi. A taki te a kon bigi a sa pai Anansi. Ma now Anansi ben abi en moni fanowdu. So ala dei a ben go na Tyotyo fu aksi en a moni. Ma ala leisi Tyotyo ben taigi Anansi taki: "Mi no bigi ete."
Now someni yari langa toku Tyotyo no man kon bigi ete. Ma wan dei, wan sma kon taigi Anansi taki Tyotyo no e kon bigi moro. Na so nomo ai tan. So ala dei Anansi ben go meki trobi nanga Tyotyo fu en moni di a ben mus pai baka.
Dan di Tigri kon yere a tori, a seni kari Anansi. A taigi Anansi taki: "Mi sa pai a moni gi Tyotyo."
Ma now Tigri pai moro furu leki san Tyotyo ben abi fu pai. Wan dei Tigri kon yere taki a ben pai Anansi moro furu. So a kon miti Anansi wan dei, dan a aksi en a tra moni. Dan Anansi taigi Tigri taki a sa seni wan fu den pikin fu en fu go na wan godo fu go teki a moni.
Ma now, di a fosi pikin e gwe, dan Anansi taigi en taki a no mus drai kon baka. A mus tan na ini a godo, bika no wan sma mus pai en. Dan di a fosi wan no kon baka, dan Anansi seni wan tra pikin fu go luku pe a trawan tan so langa. Ma Anansi taigi en tu taki a no mus drai kon baka. So Anansi seni ala en pikin gwe. Dan Anansi srefi go ini a godo.
Di Tigri si taki Anansi no e drai baka, a waka go ensrefi na a godo. Di Tigri si a godo en ati bron. A teki a godo dan a tyari en gwe.
Ma Tigri en mama ben e libi na wan presi san den e kari Sowtuwatrasei. Nomo Anansi bigin bari ini a godo: "Mi tata Tigri! Yu mama dede na Sowtuwatrasei." Ne Tigri stop. A arki baka, dan a yere a srefi sani baka. Tigri skreki! A teki bribi wantron, bikasi a ben denki taki wan sma ben bari gi en taki en mama dede. So Tigri no kon nanga wan weri, a fringi a godo gwe, dan a lon go luku en mama. Ma di a doro, a si taki en mama no dede.
Dan so ala den Anansi kmoto fu a godo. Te leki tide dan Tigri no kisi en moni ete.



© Copyright 2002 SIL. All rights reserved worldwide.