Boni

Arkiman, un sabi dati Boni, Baron, Syulikeur, nanga tra wan ben de den bigi edeman di feti ini Sranan nanga den bakra srudati. Fu opo Kawina liba te nanga Marwina liba de a presi pe den feti sei na sei den dri nengre edeman: Boni, Baron, nanga Syulikeur. A tra sei ben de den painengre di den ben kari redimusu makandra nanga bakra srudati. Bakra tyari den so fara. Den meki nengre opo gon a nengre tapu. Papa opo gon na pikin tapu. Pikin opo gon na en papa tapu. Brada opo gon a tapu brada. Nengre e kiri nengre gi bakra. Foto nengre e feti nanga lowe nengre.
Dei den bakra srudati nanga den redi musu nengre moro den lowe nengre, Boni a edeman fu den lowe nengre go tan ini Marwina pe Boni tya ala lowe nengre makandra. A ten dati den nengre ben teki Boni solek' den gado.
Boiti bakra Boni ben abi tra feyanti. A tra feyanti a den nengre di den kari Aucaaners. Ala fasi den Aucaaners e pruberi kisi Boni, ma Boni no ben de soso bana. A ben abi bwas'man obia psa marki. Wan fu den obia fu boni de so: Pe Boni meki en kampu ini busi, krosbei a kampu wan tyeptyepi de, sodat' ibri lowe srafu of trasma di de ini a birti e go waka ini a tyeptyepi. Solek' wan sma poti futu ini a tyeptyepi, awansi pe Boni de, a sabi sma de krosbei en kampu. Ef' a de feyanti Boni, den Aucaaners, no ben de ook futuboi fu Boni. Den ben sabi èn abi bun opi. Man e go miti man. Den Aucaaners e go kisi Boni pe den wani. A ben psa so. Arki.
Boni no ben abi frow. Èn wawan ben libi ini wan kampu ini busbusi krosbei wan tyeptyepi. Disi den Aucaaners sabi, ma san den Aucaaners no ben sabi na a obia fu Boni di abi fu a tyeptyepi. Bika solek' wan sma poti futu ini a tyeptyepi wantron Boni e sabi. Someni tori de fu a fasi de den Aucaaners kisi Boni. Wan fu den tori de so.
Di a ferferi den Aucaaners den no kan feni okasi kiri of teki Boni of vangen den aucaaners kari of seti wan konmakandra pe den kruderi seti wan krafana fu kisi Boni. Den Aucaaners kruderi nanga den obiaman e go wroko a tapu Boni nen te a kisi pontu. A obiaman fu den Aucaaners wroko dri dei, dri neti ini dungru ini busi sondro nyannyan sondro dringi. Di na wroko fu na obiaman fu den Aucaaners kisi pontu, a obiaman sreka wan moi yongu wenkye di a seni go gi papa Boni. A ben psa so.
Wan bakadina Boni ben de ini en kampu ini dipi prakseri. di a kisi ensrefi a wani go na dorosei, a luku fosi ef' pasi krin. Boni si wan moi yongu wenkye tnapu krosbei en kampu. boni luku lontu, a skreki, a fruwondru. Boni, wan man di no sabi san na frede, skin gro di a si a wenkye. Boni taki: "Uma, taigi mi a fasi di yu kon dya di mi no sabi. Mi Boni, wan uma kon pe mi de, pe mi kampu de, `en mi so sabi. Mi no firi. Mi skin no taigi mi. Blesi mi Boni. Uma, taki pe yu kmoto kon dya. Uma, taki dan. Mi wani yere."
A wenkye di den Aucaaners, den feyanti fu boni, ben wroko seni gi Boni no piki. A tnapu, a luku Boni, a lafu prisiri fasi. boni kon moro krosbei, a taki: "Uma, yu kon pe mi kampu de. Y'e go kon now ini mi kampu. Yu e go tan nanga mi ini mi kampu. Yu e go de mi uma." Boni wani ori a wenkye anu. A wenkye ari en anu, a taki: "Boni, na yu na boni no? Na yu na edeman? Na yu na dada fu den Boni nengre?"
Boni piki a wenkye sorgu taki a so a de. "Mi a Boni, a dada fu den boni nengre."
A sreka wenkye, di den Aucaaners seni go na Boni fu kisi boni pe den wani, taki: "Dada Boni, bigisma de ini yu kondre. Bigisma de tu ini mi kondre. Mi dya, m'e go tan na yu. Gi mi okasi go du mi fanowdu. Mi o kon baka."
Boni seki en ede, a taki: "Uma, sanede y'e gwe fu drai baka? A no de fanowdu." A uma no gwe, a tan nanga Boni. Nanga aladi Boni taki na uma teki na uma ini en kampu toku a no abi bribi a tapu na uma. Boni e luku san a uma e du. Ma a baka someni wiki di Boni si a uma no e du sani di no fiti, no wani lowe, Boni lasi ensrefi nanga na sreka uma di den Aucaaners seni go na Boni fu kisi boni pe den wani.
Wan dei di boni nanga na sreka uma e taki tori na uma taki: "Dada Boni, yu abi solek' un yere bun obia, ma yu no mu denki a yu wawan abi. Mi abi bun obi tu. Te yu wani mi e go leri yu wantu fu mi koni. Mi kan sori yu furu sortu busi wiwiri ini a busi di a kande yu no sabi a fasi di yu mu wroko nanga den. Wiwiri de di te yu sabi wroko nanga den, yu kan broko foto fu bakra. Boni, yu sabi suma kisi asaw poti ini koi a no yu dagu. a sma di tya asaw go beri ini sabana a no yu dagu tu."
A uma di den Aucaaners sreka gi Boni fu kan kisi Boni kiri taki: "Dada Boni, libi takru ala sei ma w'e go yepi makandra solek' a fiti." Sensi a uma taki den wortu disi Boni lasi ensrefi. A frigiti luku a fasi di na uma e libi nanga en. Boni bribi ala an na uma e taki. Wan neti di Boni poti en ede a tapu a uma bowtu, na uma e prei nanga Boni ede wiwiri di no ben koti bun langa. A uma firi wan tranga sani a mindri Dada Boni ede wiwiri. Na uma ari san a firi. Boni opo, a taki: "Uma, yu sabi san yu ori?"
"Nono, Dada Boni," na uma taki.
"San yu ori na yu anu na mi moro bun obia. A wan sreka pisi isri. A tu pisi de."
Dada Boni sori a wenkye a tra pisi sreka isri, ataki: "Den pisi disi a mi krakti. suma abi den abi Boni tu. den isri disi e tapu ala kugru, ala tra feti sani. kugru no e kiri mi, owru no e kapu mi, lanser no e sutu mi. Notnoti kan psa nanga mi ini feti. Den isri e tapu ala kugru fu bakra gon."
Boni brasa na uma, a taki: "Mi uma, ef' a mu de so bakra ef' tra feyanti kisi mi, teki a pisi isri disi (Boni sori na wenkye a pis' isri), bori makandra nanga den wiwiri disi (Boni sori a uma den wiwiri), solek' yu bori isri nanga wiwiri makandra yu kan kon pe mi de kon teki mi."
A uma brasa Boni, a taki: "Dada Boni, yu mi masra, yu koni pas marki. Mi abi lespeki fu yu koni, yu obia. Te a wan anu wasi a tra wan, tu anu e go krin. Yu abi bun obia. Mi abi bun obia tu. Te un moksi den obia, no wan sma kan broko unu. Bika suma e tyari asaw go beri ini sabana a no pikin nengre." A uma taki: "Dada Boni, bigisma taki san de na ontiman ede de na dia futu. M'e go suku den wiwiri di mi abi fanowdu fu bori a obia makandra."
Boni e fertrow na uma, sodat' a lasi ala voorzichtigheid, ala waakzaamheid. Na uma gwe go suku den fanowdu busi wiwiri solek' a taki. Ma a no ben tru. A uma no go bun busi wiwiri. di a kmoto ini Boni kampu a go ini a busi pe a sabi den Aucaaners den feyanti fu boni de makandra. A sreka wenkye di den Aucaaners seni gi Boni go na den Aucaaners nanga a wan pisi isri, a obia fu Dada Boni.
Now Boni wakti moro dan wan yuru. Di a uma no drai baka, Boni kisi ensrefi, a taki nanga ensrefi: "Bles' mi Boni Dada fu ala Boni nengre. Mi kon owru. a uma kisi mi. a gwe nanga mi obia, mi gran obia. Mi Boni, sreka mi eigi dede olo."
Di a sreka uma de pe den Aucaaners, den feyanti fu boni de, a taki: "Brada ala sei, mi drai baka. Mi wawan no kon ma mi kon nanga Dada Boni. Mi tya Dada Boni kon. Boni, di wani kiri den Aucaaners." Ma den man di si na a uma wawan kon taki: "Uma i denki teki unu mek' yu spotu popki? Pe, pe, pe, Boni de? Pe a de?
A uma sori den Aucaaners a pisi isri fu Boni, a gran obia fu Boni. Na uma taki: "Un alamala a sikiman. Un no sabi san e psa nanga un. Un luku san mi kari kon. Te un abi disi, un abi Boni tu."
Now fosi den Aucaaners poti yesi e arki san a uma e taki. Na uma taki moro fara: "Brada, un mu drai anu pari a boto. Bika te un tan wroko solek' un bigin, ini tin yari un n'e go kisi Boni fu kiri. Mi abi wan pisi fu Boni obia. w'e go wroko nanga Boni eigi obia. te un pori a gran obia fu boni a no abi wan enkri koni, bika nanga na isri, na obia fu boni, e meki kugru sutu trawan. w;e go baka Boni nanga en eigi fatu. Brada, un ferstan san mi taki?"
Den Aucaaners go pe den sabi pe Boni kampu de. Boni no ben de ini a kampu. a ben go du fanowdu ini wan busi berpe. den Aucaaners si Boni tnapu a fesi wan gregi ini a busi, e taki sani di den Aucaaners no e ferstan. di Boni seti en wroko bun fasi a dede kon na tap' sei. Den Aucaaners, Boni feyanti, e luku san Boni e du. boni luku pe son e opo. a sref' ten den Aucaaners sutu Boni nanga pispisi isri fu a pisi obia di a sreka uma ben teki fu Boni tyari gi den Aucaaners. Di Boni fadon a tapu en fesi na tpau a grebi, ma a no dede. Den Aucaaners di si Boni no dede den taki: "Yu Boni, wan dei fu sabku, wan dei fu tyotyon. Tidei na un dei. Man de na opo ma man de bele tu. Yu de psa kba. san yu abi fu taki?"
Den Aucaaners go nanga boni ini den kondre. Boni luku en masra nengre a taki: "Un Boni nengre, un dada o dede. Suma wani mi koni a piki?" No wan boni nengre piki bika den frede den Aucaaners e go kiri a sma di teki a wani den obia fu boni. Ma wan boi di ben de nanga den bigi man taki: "Dada dada, mi wani yu obia. Mi, mi wani yu obia."
Wan Aucaaner wani ori a boi ma wan ede man taki: "A kunsu, libi a boi fu tata Bambi. a boi no sabi san a wani."
Boni luku a boi, a taki: "Boi fu tata Bambi, mi yere. Un Boni nengre, tide mi kba nanga unu. Boni, un dada, n'e go de moro."
ala a ten den Aucaaners ori krutu. Den Aucaaners libi boni a eri dei ini son. Neti den libi boni ini a kowru. Di dei opo boni no ben abi krakti moro. A ari wawan bro. A baka wan yuru boni dede.
Ma arkiman, lanti ben poti moni a tapu Boni ede. suma kisi of kiri Boni, tyari na ede fu Boni go na foto, e kisi moni. Sodati di Boni dede den Aucaaners koti Boni ede fu ben go ini a foto nanga a ede fu Boni fu lanti pai a moni. Ma a ede fu Boni no doro foto. Na ede fu Boni fadon ini liba. Dati ben de ini a yari 1793. Den Boni nengre bari di den sabi den dada ede de ini a liba. Den boni nengre bari: "Dungru loktu, safri winti, dipi liba pe dada Boni didon, gridi piren e dyompo e lafu di mi ben aksi Boni ede de a gron. Yere den pari e wipi watra fu a dipi liba pe Boni ede didon. Yere a faya nengre singi: Maya taigi Boni den pikin e kon. Dada, dada Boni. Dada fu srudati, tata fu nengre di fu pranasi lowe, opo ai luku a tapu. Gran tata Boni, yu pikin fu Daguwe." Wan owru nengre sabiman fu liba di ben sidon a tapu wan ston ben srapu en yesi opo tnapu bari" "Mati-o, mati-o, yere den dron, yere den dron, a fasi di den e lafu ini a olo pe Boni ede didon. Yere na apinti, yere a bongo. Dada Boni yu pikin e kon." A singi koti. A owru nengre luku a taki: "Wi ben dya a dei di bakra wini. Furu brudu lon bifo un go nanga dada ede na fotosei. Dada Boni, papafu srudati, tata fu srafu di fu pranasi lowe, opo ai luku loktu, Gran tata Boni pikin fu Daguwe. Mi skreki, mi bari: Mati-o, mati-o, dada Boni gwe. Bakra srudati sutu a no yepi. Now dada boni ede fele. A tapu a liba watra redi flaka solek' den brudu a tapu oli fadon. Dondru bari rigeri a liba watra fu ala ten. Dada Boni, yu gwe."
A owru nengre, sabiman fu liba, papa fu dusun dungru pikin e krei. Pariman tiri solek' ston poptyi e luku den skin. A tan solek' ondro liba watra bongo nanga dondru opruru e kon. so esi leki sneki e buba e kenki. Wantron a tapu kindi a ben fadon. "Papa Boni, papa fu srudati, tata fu nengre di fu pranasi lowe, broko boto bari abra liba: "Suma yepi bakra e go dede tu. Dungru loktu, safriwinti a tap' liba pe dada Boni wawan ben kan opo gi suma a ben wani sabi liba di drape e tan. Papa, papa Boni, now di yu ati seti afo fu un nengre di de ini boto e dreigi, bari, lafu na abra liba watra suma yepi ptata, solek' ptata a mu dede."

Arkiman, disi ben de wan pikin tori fu dada Boni. Boni, Syulikeur, Baron di ben de edeman, fetiman fu den Boni nengre.

Arkiman, dan a stotu te dya. Un kuneti alasei.