Boiki ben de wan boi fu fo yari. A ben hogri. A ben lobi fu taktaki èn luku sani finifini. En papa ben
de wan srudati skowtu, èn en mama ben de wan wroko-uma. Fa den ben wroko, den no ben de furu na oso. Den
no ben man luku Boiki so bun. So den ben meki en granmama fu en papa sei ben luku en. Efu en granmama no ben de
na oso, dan en tante Milka ben luku en.
Wan dei Milka ben sidon nanga en mati ini a balkon e taki tori. Te yu ben tnapu na strati sei, yu no ben man si
ini a balkon. Milka ben abi wan nefo Ruben, di noiti ben lafu. Ala leisi te a ben kon luku en famiri, a ben tnapu
fesi a poort e taki odi. En efu a ben tyari wan boskopu a ben gwe esesi. Noiti a ben abi ten.
A dei dati Ruben ben weri wan owruten susu, san yu ben mus lafu te yu ben si en. Boiki ben sidon tapu a skotu e
luku go na strati. Di Ruben kon krosbei fu a skotu, Boiki taki: "Mama, ééééé,
dati na wan bigi s'su!" A bari: "Tanta Milka, kon luku. Omu Ruben weri wan bigi s'su!"
Milka nanga en mati bigin lafu, ma Ruben no ben si den. Ruben taki: "Tanta Lise, i no de na oso?"
Milka, san du leki en noso ben brudu, no ben lafu moro. A opo tnapu èn a taki: "Mi mama no de."
Boiki aksi Ruben: "Taigi mi pe yu bai a s'su?" Ruben no piki en. A aksi Milka: "Pe yu mama de dan?"
Boiki aksi na mindri: "Taigi mi pe yu bai a s'su disi?"
Milka taki: "Wakti. Boiki kba. Saka fu a skotu!"
Boiki saka. Ne a bigin lafu èn a taki: "Omu Ruben, len' mi yu s'su mek' mi go rei oto."
Ruben bigin lafu. Ne a waka go insei, dan a teki presi sei Milka en mati.
Milka lon go teki wan tiki insei fu wipi Boiki. Boiki ben tnapu so sari e luku efu Milka bo kon naki en. Ne Ruben
kari Boiki na en sei èn a bigin tigri tigri en. Di Milka kon na dorosei, di a si en nefo ben sidon na sei
en mati, a bigin fu lafu. A puru Boiki ini Ruben anu. Ne a sori a wipi ini Boiki fesi èn a taki: "Mi
no wani fu yu lafu bigisma. Yu yere mi?"
Boiki taki: "Iya, tanta Milka."
Milka no naki en moro. Ne Ruben teki Boiki baka èn a prei nanga en ede. Dan Milka taki: "Ruben, san
kis' yu tide fu kon na insei? Disi na a fos' leisi dat yu e kon na insei."
Ruben piki: "We, now fosi mi si sortu s'su mi weri." Ne den alamala bigin lafu.
Boiki papa ben abi wan delaila san ben fiti Ruben. Dan Milka gi Ruben a delaila dati. So a weri en èn a
gwe nanga en susu ini wan saka.
Dagour ben de wan boiti boi. En papa ben abi wan gron pe a ben prani: gruntu, kasaba, napi, taya nanga wantu
sani moro, èn a ben kweki kaw nanga wan dagu.
Dagour no ben lobi a dagu, bikasi te den mati fu en ben wani ferferi en, den ben kari en dagu. `En en papa ben
lobi fu prei nanga a dagu. Ma te a dagu ben go ini Dagour birti, a ben yagi en gwe. Dan efu en papa ben yere, a
ben bari Dagour. A dagu den ben kari Dagu.
So wan dei en mama ben meki roti nanga fowru meti klari. Di Dagour kmoto fu skoro, a ben go sribi ini en kamra.
En mama ben poti nyanyan ini tu difrenti preti tapu a tafra ini a kukru, dan a tapu den nanga wan duku. Di en mama
kba nyan, a go hari en baka ini a amaka san den ben tai ondro a manya bon sei a oso. Mama ben fergiti dagu.
Baka wan pisten Papa doro na oso. A go wasi èn a weri krin krosi, dan a go na ini a kukru. A luku tapu a
tafra. Ne di a si den preti ben tapu nanga a duku, èn di a puru a duku, a no ben sabi sortu preti ben de
fu en. A bari gi Mama: "Suma abi den nyanyan disi?"
Mama san no ben sribi ete taki: "A wan ini a bigi preti na fu yu, èn a trawan na fu Dagour."
Papa no ben yere Mama so bun, a yere dati a trawan na fu Dagu. So a iti den tu roti nanga wan pisi fowru bowtu
san Mama ben poti gi Dagour, gi Dagu.
Dagu noiti ben nyan meti. So Dagu san ben abi angri, nyan so switi dati a go sribi tapu a stupu na mofo a kukru
doro.
Di Papa kba nyan, a teki wan sturu dan go sidon ondro a manya bon e taki tori nanga Mama.
Baka wan pisten Dagour wiki. A go luku wantron ini a kukru, efu nyanyan de. Di a no si noti, a waka go na en mama.
A aksi en taki: "Mama, pe mi nyanyan de?"
Mama luku Papa. Papa hori en ede, dan a taki: "Mi mama! Mi no yere yu so bun, frow. Mi iti a nyanyan gi Dagu."
Dagour bigin krei, bikasi a ben abi angri. Dan Papa taki: "Mi boi, teki wan golu èn go bai wan bami
gi yu."
Dagour kba nanga krei. A teki a moni, dan a waka gwe. Di a doro krosbei pe Dagu ben sribi, a teki wan tiki san
ben de leti na gron dape, dan a naki Dagu nanga a tiki. Ne Dagu dyompo opo. Fa Dagour ben wani naki Dagu baka,
Dagu beti en na en futu. Dagour skreki dati a trowe a tiki, èn a lon go na Papa.
Papa san ben si ala sani, taki: "Yu donman - kuku nengre yu! Efu yu no ben naki a dagu, a no ben sa beti yu."
Dagour krei.
Mama taki: "Tan tiri, boi."
Papa opo go teki en Eerste-Hulp dosu, dan a poti dresi gi Dagour en futu, dan a seni en gwe. So sensi a dei dati,
noiti moro Dagour naki a dagu.
Dofi ben de wan man san ben gebore ini pranasi. Nanga en frow a ben meki tu boi nanga tu umapikin. Dofi ben
de waktiman na a watra kantoro na ini a pranasi.
Ini december 1968, fo dei fosi nyunyari bo opo, a hindustani wenkri ben kisi teevee. A ben de a fosi leisi ini
a pranasi dati den ben kisi teevee.
So Dofi en frow, Lène, ben taigi en meki a bai wan teevee leki kado fu nyunyari gi den pikin. Dofi ben feni
en wan bun prakseri.
So a tra dei Dofi go teki moni na kantoro. Di a doro drape, a taki: "Bun morgu," dan a sori a kantoroman
en wrokokarta.
Ne a man piki en: "Bun morgu, meneer Dofi. Lanti no pai ete. Ma ef' yu kon tamara, dan mi denk' dati den sa
pai kba."
Dofi bigin rigeri nanga a man. Ne a taki: "Ala mun te twenti-na-neigi mi e kon tek' mi moni. En a mun disi
mi wan' bai wan teevee gi den pikin fu mi. Meneer, ef' yu no pai mi mi moni, mi no sab' san o psa nanga yu tide."
Wan tra waktiman san ben kon net insei taki: "Dofi, sanede yu e mek' trobi nanga a man? Wins' yu rigeri te
tamara mamanten, yu no man kisi yu moni."
Ne Dofi sori a man wan kofu, èn a taki nanga atibron: "Mi den e kari Dofi, a paiman."
A waktiman bai diya futu, a lon gwe. Bikasi te Dofi ben taki so, dati efu yu no lon, ai gi yu mankeri.
A kantoroman bigin beifi. A taki: "Meneer Dofi, tangi tangi, ef' yu kon tamara, yu o kisi yu moni."
Dan Dofi taki: "Meneer, ef' mi kon tamara, dan yu no gi mi mi moni, dan yu no mus de ini a pranasi moro!"
Dan Dofi waka gwe.
A tra mamanten wan ten fu aiti yuru, Dofi doro na kantoro. Lanti ben seni moni kon na kantoro kba, so Dofi kisi
en moni. So Dofi lon go esesi na a wenkri. A bai a teevee èn a go na oso. Frow Lène nanga den pikin
ben breiti di den si dati Dofi ben kon nanga a teevee. Dofi no wroko a dei dati moro.
Neti yuru Dofi, Lène nanga den pikin ben sidon ini a foroisi e luku teevee. So wan kawboi prenki ben drai
na teevee. A prenki ben span. Tu man ini a prenki ben luru fu sutu densrefi. Ne wan fu den man ben kisi wan okasi
fu sutu a trawan, san ben kibri baka wan doro.
So a prenki ben sori a gonmofo kon te na a grasi fu a teevee. Ne wan fu den boi fu Dofi bari:
"Papa, a man wan' sut' mi kiri!"
A srefi momenti frow Lène taki: "Dofi, a man wan' kiri mi tu. Du wan sani now!"
Ne den alamala go kibri ini den kamra. Dofi teki en ontigon, dan a kroipi safri baka wan sturu ini a foroisi. A
srefi momenti a man ini a prenki sutu a gon so: Pang.
Ne frow Lene taki: "Dofi, a man sut' yu?"
Dofi taki: "No. Mi o sori en."
Ne Dofi marki en gon go tapu a teevee. A man ini a prenki ben lafu di a si dati a sutu a trawan kiri.
Dan Dofi taki: "Yu wani lafu ete. A mi den e kari Dofi, a paiman."
Ne Dofi sutu so: Boow. A teevee sutu so: Boom. En a sei pe a teevee ben de teki faya.
Frow Lène nanga den pikin bari: "Y/e/e/eh. Papa sut' a man."
Dofi taki: "Un kon yep' mi. A oso e bron."
Dan den lon go yepi Dofi esesi fu tapu a faya. So den span anu makandra èn kiri a faya. A kanti pe a teevee
ben de, ben bron pikinso.
A oso ben kon trubu. Ne frow Lène nanga den pikin ben krin a presi èn poti ala sani tapu en presi.
Dofi ben yepi wan anu tu.
Di den kba fu poti ala sani tapu en presi, a kriboi meisye fu en taki: "Papa, ef' yu no ben de, a man bo kiri
unu."
Ne Dofi lafu èn a gi a meisye wan bosi na en seifesi. Dan frow Lène taki: "A sani san miti wi
tide, ben de un nyunyari kado." Dan den go sribi.
Efu wan sma taki: "A man na wan professor," dan ala sma e denki dati na wan koni man, wan sma san
sabi ala sani. En den e si en leki wan gado. Owktu den e prakseri dati noiti so wan man kan lei.
So Professor Koni ben gi les na universiteit. Te a ben gi les, yu ben yere te wan pina srefi ben fadon, fa den
stukapikin ben sidon arki en so tiri.
So wan dei, professor kon ini a klas. Dan a taki: "Bun morgu, stuka meisye nanga stuka boi." A poti en
tas tapu a tafra, dan a taki: "Mi fen' wan nyun sani tide baka."
Ala den stuka sma ben aksi densrefi: "San a man disi o du baka?"
Dan a teki tu pikin batra ini en tas. Dan a go ini wan uku èn a plasye ini wan fu den batra. En ini a tra
batra a poti pikinso watra, dan a poti wan maggiblok san no ben abi sowtu, dan a sekseki a batra. Dan a poti den
tu batra tapu a tafra.
Ne a trusu en wijsfinga ini a batra nanga plasye, dan a trusu en mindrifinga ini en mofo.
A srefi fasi a du nanga a tra batra. Dan a taki: "Mi wan' sori unu nanga disi, dati a plasye nanga a maggiblok
watra abi a sref' tesi."
Wantu fu den stukapikin bigin lafu. Trawan ben taki: "A man disi law kba."
So wan heri dyugudyugu kon ini a klas. Dan a professor taigi den meki den tan tiri èn no span. "Ala
sani de fu pruberi. Unu kon tesi srefi?"
Den no ben wani, ma professor korkori den te den alamala kon tesi srefi. Di ala sma ben kba tesi, a professor bigin
lafu den.
A taki: "Unu noiti kan kon tron wan professor, bika un no luku fini san mi du. Mi pot' mi wijsfinga ini den
batra, dan mi trusu mi mindrifinga ini mi mofo."
Den skreki di den yere fu a professor san a du. Wantron wantu bigin krabu den neki èn go spiti. Trawan poti
den finga ini den mofo fu braak.
Ne professor taki: "So a de ini a libi. A no ala san wan sma e taigi yu, yu mus du. Yu mus arki èn
luku bun san a sma e taigi yu."
Rudi ben tan na wan bakabini birti. Someni leisi a ben doro lati na skoro. Ala leisi te a ben kon lati, yefrow
ben gi en strafu. Ma toku dati no ben yepi. Ne yefrow seni kari en mama, èn a aksi en fusanede Rudi ben
kon lati ala leisi. Ne mama piki: "Yefrow, un no abi oloisi na oso, ma tide mi sa bai wan. Dan bigin tamara
Rudi no sa kon lati moro."
Dan yefrow taki: "A bun, mefrow."
So mama go na wowoyo èn a bai wantu sani fu bori. Dan a go na wan sneisi wenkri, dan a taki: "Omu,
gi mi wan oloisi."
Omu teki a oloisi, dan a gi en keti, èn a taki: "Frow, te a oloisi tan tiri, dan yu mu gi en keti na
bakasei."
Mama no ben luku san a sneisi ben du, a arki wawan. A teki a oloisi èn a go na oso. Di Rudi kon na oso,
a ben breiti fu si a oloisi. A taki: "Mama, mi no sa go lati na skoro moro."
A tamara mamanten di mama wiki a si dati a oloisi ben tan tiri. A teki a oloisi, a draidrai luku a oloisi, a prakseri:
"Fa mi mus wroko nanga a sani disi? A sneisi ben taigi mi dat mi ben mus gi en keti na bakasei. Ma a no gi
mi a keti fu a sani disi." Mama kari Rudi, dan a taki: "Tyari a oloisi gi a sneisi baka, èn aksi
en fa mi mus gi en keti. Dan yu e go bai wan saka aleisi na wowoyo."
Rudi teki a oloisi dan a go na a sneisi. A taki: "Omu, esde mi mama ben kon bai a oloisi disi. A taki dat
a no sabi fa a mus gi en keti."
Omu piki: "Yere boi, mi ben sori yu mama fa a ben mus wroko nanga a oloisi, ma a no ben luku san mi ben du.
Ma luku bun san mi o du. Na a knop bakasei fu a oloisi yu mus drai, dan ai bigin waka." Omu poti a oloisi
ini a dosu, dan a gi Rudi en.
Rudi teki a oloisi dan a go na wowoyo. A bai a saka aleisi, dan a poti en tapu en ede èn a waka gwe. Ondro
pasi Rudi ben firi weri. A go sidon tapu wan bangi sei pasi. A teki a oloisi dan a taki: "Yere mi dya. Omu
taki te mi e drai a knop na bakasei, dan yu e bigin waka. Ma yere, soso mi e weri misrefi nanga yu. Mi sa poti
a saka na mi sei, so mi no abi presi fu poti yu. Yere, mi o libi yu dya, dan yu sa waka kon na oso."
Di a doro na oso, mama aksi en pe a oloisi de. Rudi piki: "We mama, mi lib' en tapu wan bangi sei pasi. Mi
taigi en mek' a waka kon en srefi, bika mi ben weri pikinso."
Ne mama taki: "Yu don boi yu! Fa a oloisi o waka kon en srefi? A no abi futu."
Ne mama teki wan wipi, dan a fon Rudi bun. A taki: "A no fu soso mi e gi yu nyanyan, èn sen' yu go
na skoro. Te mi no sab' wan sani, dan yu mus yepi mi. Yere, mi no wan' yere noti san yu wan' taki. A lati kba.
Yu e go na skoro. Tek' yu tas dya, èn esi."
Rudi taki: "Mama, yu abi leti. Ma yu o wan' meki yefrow gi mi strafu baka? Mama, mi lobi yu. Mi sa bai yu
oloisi baka."
Mama luku Rudi èn a bigin krei. A taki: "Mi boi, gi mi pardon fu san mi du nanga yu. Mi kisi trobi
nanga yu papa tide mamanten, so mi pur' a atibron na tapu yu. Te a kon, mi sa mek' en bun nanga en. Ma yu na mi
wan ai karu, so tek' moni dya èn go bai a oloisi. Yu naf' go na skoro tide moro."
Rudi go bai a oloisi. Di a kon na oso, papa nanga mama ben taki switi tori èn bari lafu. Rudi gi en mama
a oloisi. Mama taigi en dati a kan seti a oloisi. Di Rudi ben kba, papa taki: "Mi boi, yu de wan koni boi."
Rudi luku en mama. Mama taki: "Ai mi boi, a tru san yu papa taki."
A tra dei di a go na skoro, yefrow aksi en: "Fusanede yu no ben kon na skoro esde?"
Rudi ferteri en ala san ben psa. Yefrow luku Rudi èn a lafu. A taki: "Ala yari mi e yere wan tra nowtu."
© Copyright 2002 SIL. All rights reserved worldwide.