Fatu Fransje

Fatu Fransje ben de wan fatu meisje. A ben leri fu rolschaatsen na Bakrakondre. A ben de wan prisiri meisje tu. Ala bakadina a ben schaatse tapu a strati pe a ben libi.
Wan bakadina en mama seni en go bai brede na wenkri. Fransje teki den rolschaatsen fu en, dan a rei gwe. Fransje ben singi. A ben meki wantu modo èn a ben rei tranga tu. Dan fa Fransje e doro a wenkri, wan dagu lon kmoto fu wan prasi èn a bigin lon baka Fransje.
Fransje bigin bari: "Mama, kon yepi! Un kon yepi mi!" Wantu boi di ben prei bal na sei pasi hiti wan ston naki a dagu. So meki Fransje ben kan stop. Fransje blo ben de na tapu. Fransje rei go na den boi. A taki den boi tangi, dan a go esi go bai a brede gi en mama.
Ma di Fransje e drai go baka na oso, a rei wan tra fasi. Dan fa ai singi, a yere wan sma kari en. A drai luku èn si dati a ben de en omu pikin, Lucil. A drai go na en. Dan den bigin blo tori. Dan baka wan pisten Lucil taki: "Fransje, mi gudu, mi friyari tide. Mi tapu tina-aiti yari tide. Mi o dansi tide neti. Yu mu kon, yèrè?"
Fransje piki en taki: "We, mi no sabi efu mi mama o wani meki mi kon. Ma no span. Mi o du muiti fu kon." Dan na so den prati pasi. Dan Fransje esi go na oso.
Di a doro oso, en mama aksi en: "Fransje, pe yu tan so langa? Sensi fo yuru mi seni yu fu go bai brede. Luku tapu a oloisi. Na siksi yuru kba. Dan na now yu e doro?"
Fransje taki: "Mama, di mi rei go na wenkri, dan wan dagu lon baka mi. So mi go lontu. Dan owktu mi miti Lucil, dan mi ben taki pikinso tori nanga en."
Mama taki: "Ooooo, ma yu sabi taki yu mu wasi dotisani ete. Dan toku yu e tan so langa. A bun. Yere dya, mi no wani fu yu rei den schaatse moro. Gi mi den brede dya, èn psa go wasi den dotisani."
Fransje no du noti moro leki a go wasi a dotisani. Di a kba, a aksi en mama: "Mama, mi mag go na a friyari- oso fu Lucil?"
Mama taki: "We, mi taki yu n'e go no wan presi tide! Ma yu no kan gwe tu. Bika dyonsro mi o go na tante Nelli."
Dan Fransje go wasi. Dan baka dati a sroto ensrefi ini en kamra. Di en mama gwe wan pisten, Fransje weri en moi weti yapon nanga en susu. Dan a teki pasi go na a friyari-oso.
Fa Fransje doro mofo a doro fu Lucil, wan oto rei tranga psa na ini a tokotoko watra na sei a pasi, dati a tokotoko watra flei go tapu Fransje krosi. A doti en heri skin tu. Fransje wraak. A kosi a man, ma a man no yere en. Lucil di si san psa, lon tyari wan wasduku gi en. Fransje figifigi en skin, dan a taki: "Grantangi. Ma mi no man tan moro. Mi o go na oso, bika mi yapon doti tumsi. Ma mi fristeri yu, èn psa wan bun dei moro fara."
Lucil taki: "A bun. Ma wakti." Dan Lucil lon go teki wantu switisani na inisei gi Fransje. Fransje gi Lucil wan bosi dan a gwe. Fosi a doro na oso a nyan ala den switi sani.
Di a go na inisei a skreki di a si en mama. En mama iti wan susu tapu en. A taki: "Fransje, yu n'e yere te m'e taki nanga yu? Yu na angri si skapu. Te yu wani yu kan du so wan sani baka, dan yu o si san mi o du nanga yu! A bun dan. Yèrè, yu e go wasi èn go sribi wantron. No wan nyanyan yu n'e nyan tide moro. Owktu mi no mu yere noti moro!" Fransje tan pi èn a du san a ben mus du.
A tra dei baka di Fransje du ala en osowroko, a boro safri gwe. Dan soleki fa a ben gwenti fu schaatse ala bakadina, a ben singi èn meki modo. Owktu a ben rei tranga. Fa Fransje psa a uku fu a strati, wan man tapu wan burikiwagi koti go na letisei fu a pasi. Di Fransje si a man, a ben de krosbei kba. Ma fa Fransje ben rei tranga tu, a no ben man stop moro. So Fransje koti pasi. A rei langalanga go tapu wan tenti pe wantu sma ben e nyan èn dringi. A heri tenti fadon tapu den sma, ma koloku, no wan fu den kisi mankeri.
Ma di a drai luku. A si taki a tenti fadon, a rei gwe esesi. Dan di a si dati no wan sma ben rei kon na en baka, a go bro ondro wan bigi bon na sei pasi. Fransje blo ben de na tapu. A puru den schaatsen na en futu. Dan a teki en saka-anyisa èn a bigin wai winti.
A srefi momenti wan boi fu en birti ben rei kon tapu wan baisigri. Di a si Fransje a bari: "Fatu tonton, yu dondon, bikasi yu e nyan furu tonton."
Fransje atibron, a bari: "Mi o kisi yu! Bontyi yu."
Fransje weri en schaatsen, dan a bigin rei baka a boi. Di a boi drai luku, a si dati Fransje bo kisi en, a bigin trapu moro esi. Den sma tapu strati ben luku so ferwondru. Tu frow san ben tyapu na sei strati, wan fu den taki: "Frow, luku san wan fatu meisje e du." Dan den bigin lafu.
Dan a boi koti go ini wan strati sei wan bigi gotro. Fa Fransje ben rei tranga a no bo man koti go ini a pasi. So a rei langalanga go tapu wan man san ben de tapu wan trapu sei pasi e ferfi wan lanteri. A man fadon nanga a ferfi èn morsu en heri skin. Fransje flei go tapu wan man san ben tyari wan baskita nanga bakba tapu en ede. Di a man fadon a lon gwe libi a eri baskita. Fransje grabu a lanteripaal na tapu a uku ori. A teki pikinso blo. Dan a luku pe a boi ben de. A boi ben stop na mindri sei fu a pasi. Fransje rei go na en. Fransje puru en schaatsen. Dan a taki: "Yu wan si dati mi e klap yu?"
Ma bifo a boi piki: "Iya," dan Fransje ben klap en kba. A boi no libi abra. Den bigin feti leki tu tigri. Den ben lolo kofu bun tu. Bun furu sma ben tnapu lontu den. Den feti te den kon doro te tapu a uku. Fransje kisi wan okasi dan a iti a boi go ini a gotro. Den sma bari wan bigi lafu. A boi lon kon nanga bigi atibron na tapu Fransje. Ma Fransje ben hori feti nanga en. Den doro te tapu a bigi pasi taki wan eri verkeersopstopping ben de. No wan sma ben kan puru den. Den ben tranga tumsi.
A ben switi gi furu sma fu si taki wan meisje e tnapu ori feti nanga wan boi. Den boi san lobi tnapu tapu a uku fu a strati bigin bari: "Yeeeeh! Tya go, Dikkie! Du yu wroko!"
Tu skowtuman di ben si san ben psa lon go puru den. Ma den srefi no ben man hari den puru. Dan den naki den wantu klap nanga a baleta. Wantron den tapu feti.
Wan fu den skowtuman taki: "Fu sanede unu e feti?"
Fransje taki: "Na en fosi begin."
A skowtuman taki: "Boi, yu no e syen fu feti nanga a meisje?"
A boi piki: "Mi taki wawan: `Fatu tonton, yu dondon bika yu e nyan furu tonton.' Dan a rei kon na mi baka, dan a naki mi."
Fransje meki sker'ai gi a boi. Fransje taki: "Ma skowtu, a no mag dreigi mi."
A boi taki: "Na mi mofo. Mi mag taki san mi wani."
Fransje no ben de fu hori moro. A hari a boi wan klap ini en fesi. Den skowtu gi Fransje wantu tik nanga a baleta. A boi ben tnapu so syen fasi bika a no ben kan naki baka. Dan den skowtu kiri a kesekese. Den meki a boi go teki en baisgri. Dan a boi rei go na oso. Ma Fransje no ben kan feni en rolschaatsen. Fransje aksi iniwan sma san a ben si efu den ben si en rolschaatsen. A suku den, ma toku a no feni den.
Di a boi doro na oso, a ferteri en mama nanga en papa san psa nanga en. En papa gi en wan steifi fonfon. En mama taki: "Dyonsro mi nanga yu e go na Fransje oso. Yu e go meki en bun nanga en baka."
A boi taki: "Ma mama, mi no o go. A naki mi sondro mi ferwakti wan klap ini mi fesi. Ma fu di den skowtu ben de dape, mi no naki en baka. Ma mi o kisi en."
A boi mama taki: "Yu boi, fa yu kan taki so wan sani. Yu no mag naki wan meisje."
A boi piki: "Ma mama, en fosi naki. Ai feti leki wan boi. So a bun fu hori slag tu."
En mama taki: "Mi no wani yere noti moro. Go weri ju pata meki wi gwe." En no ben wani gwe, ma en mama dwengi en taki a mus fu go.
Fransje no ben doro langa na oso dan a yere wan naki tapu a doro. Di a opo a doro a skreki fu si a boi nanga en mama.
A boi en mama taki: "Dag, meisje. Yu mama de na oso?"
Fosi Fransje ben wani go kari en mama, en mama ben kon tnapu na doro kba. A aksi: "San psa?"
A mama fu a boi taki: "Fa yu e tan, Mefrow? Mi tyari mi boi fu a kon meki en bun nanga Fransje. Bika a no langa na baka den feti tapu strati. Ma mi no feni en moi taki mi boi e feti nanga umasma."
Fransje mama taki: "We, mi no feni en moi tu taki mi pikin e feti nanga so wan moi boi."
Fransje di ben tnapu sei en mama, kuku fu atibron di a yere san en mama taki.
Dan a boi en mama taki: "We, now un kan meki en bun baka."
Fransje ben luku pikinso tôf, ma toku a langa en anu gi a boi. A boi ben syen. A taki: "Mi e aksi yu pardon. Mi no sa du en moro."
Fransje taki: "Grantangi. Mi no sa feti nanga yu moro."
Dan baka dati a boi nanga en mama go na oso. Mama tapu a doro. A taki: "Fransje, yu no abi yesi, no? Esde yu kon lati na oso. Tide yu feti. Dan pe den rolschaatsen fu yu de, efu mi mag sabi dati?"
Fransje piki: "Mama, mi lasi den."
Dan a no ben moi moro gi Fransje. Mama gi en wan steifi fonfon taki a ben didon tu dei nanga korsu ini bedi. Fu sensi a dei dati Fransje ben arki san en mama ben taki.