Kownufrow Margreta kisi wan langa noso


Wan dei kownu Charles ben go uku en wawan nanga en boto tapu a liba na sei fu en oso. Na ini a liba dati furu kaiman ben lai tu. Dan kownu en frow Margreta ben e sidon e luku fu a fensre fu en kamra, fa kownu e uku. Baka wan pisten a boto fu kownu drai tapu. Kownu fadon a liba. Dan den kaiman nyan en.
Kownufrow Margreta lafu, a taki: "Ai, now mi kan du san mi wani!" So efu wan sma no ben du san a ben wani, a ben meki den srudati trowe a sma ini a liba, meki den kaiman nyan en.
Someni kownu ben aksi en fu trow nanga en, ma a no ben wani, bika a ben feni taki a moi tumsi fu trow nanga den. Owktu a ben denki taki a ben de a moro moi frow di de. Furu leisi fu a dei a ben tnapu fesi en spikri e meki ensrefi moi èn luku efu ala sani e sidon bun na en skin.
Ma wan mamanten a tnapu bun langa fesi a spikri e luku ensrefi bun fu en ede kon miti en futu. Dan a kon feni taki en noso langa tumsi. Ne a bari wan bigi b'bari so: "Waaai," taki ala sma ini a oso ben skreki. Den tu waktiman di ben ori wakti na en doro pusu a doro go na insei. Den tnapu so ferwondru e luku. A kamrawentye san ben sorgu gi kownufrow ben lon doro tu. En srefi tnapu e luku so ferwondru.
Dan a kamrawentye aksi en taki: "Mi lespeki kownufrow Margreta, san psa nanga yu?"
Kownufrow drai luku den, a piri en ai dan a taki nanga tranga sten: "Mi noso langa tumsi!"
Ala den dri sma san ben de ini a kamra bigin lafu. Ne kownufrow Margreta ati bron moro. A bari taki: "Fosi neti tapu, mi wani taki un dri di de dya ini mi kamra mus feni wan fasi taki mi noso kon moi. Efu dati no psa, mi o meki den srudati koti un noso puru. Un gwe kmoto fu mi kamra!"
A kamrawentye nanga den tu waktiman skreki. Den no ben sabi san den mus du. Den kmoto ini a kamra, den tapu a kamra doro, dan den go na gron. Di den ferteri den trawan ini a oso, den srefi bigin lafu tu. Dan den alamala bigin denki san den bo du fu meki kownufrow Margreta noso kon moro moi.
Kownufrow Margreta ben sidon fesi en spikri e krei fa en noso langa so. Ala sma san ben go ini a kamra fu go taigi en taki a no tru taki en noso langa, a ben yagi den gwe. Wantu datra san suku fu yepi en a ben yagi gwe tu. Bakadina ben doro kba, dan den no ben feni no wan sma ete san ben kan yepi kownufrow Margreta.
Ete wan yuru ben tan fosi neti bo tapu. Ne wan fu den waktiman san ben ori wakti na a kamra fu kownufrow Margreta lon gwe na strati. A lon te a kon weri. Dan a go sidon na sei pasi let' ondro wan tamalenbon e krei. Ai figi en fesi, ai bro en noso, dan toku en ai e lon watra. Ai denki nomo taki: "Efu neti tapu mi no abi mi noso moro."
Ne wan man waka e kon dan a si taki en ai ben lon watra. A taki: "Yongu, yu leki wan yonk'man e sidon e krei so. Wan sani mus fu hati yu dan?"
Nanga wan kreisten a waktiman taki: "We meneer, kownufrow feni taki en noso langa tumsi. Efu un no feni wan fasi taki en noso kon moi, dan a o koti un noso puru."
A man bigin lafu leki a no de bun na en ede. A waktiman opo en ede dan a bigin lafu tu. Dan a man taki: "Iya mi boi, lafu, bika ferberde siki no abi dresi. Yèrè, tyari mi go na kownufrow. Mi na wan pikin tofruman. Mi o luku san mi kan du gi kownufrow. Kon meki un gwe!"
A man hari a waktiman opo, dan den waka go na kownufrow oso. A tra waktiman nanga a kamrawentye, senwe ben bigin naki den, taki den ben abi fu dringi sukruwatra fu den ben kan ori densrefi. Di den si taki a wan waktiman ben kon nanga wan man, den ben breiti, bika neti ben doro kba. Dan a kamrawentye lon go esi go naki tapu a kamra doro fu kownufrow Margreta. A bari taki: "Suma de dape!"
A kamrawentye piki: "Na mi, mi lespeki kownufrow. Mi tyari wan man kon gi yu san kan yepi yu."
Kownufrow Margreta taki: "Ooo. Na kon mi ben kon fu taigi wantu srudati meki den koti un dri noso puru. Meki a man kon na inisei. Ma yu kan gwe go yepi den trawan na ini a kukru."
A kamrawentye opo a doro gi a man. A man go na inisei, dan a kamrawentye tapu a doro. A go yepi den trawan ini a kukru. Kownufrow Margreta ben sidon fesi en spikri dan a aksi a man taki: "Suma na yu?"
A man piki en taki: "Mi na wan pikin tofruman. Mi nen na Branco, mi lespeki kownufrow."
Kownufrow Margreta drai luku a man nanga wan bun swa fesi. Dan a taki: "Yere dya, tofruman Branco. Mi noso langa tumsi èn mi wani taki a mu kon moi. Efu yu no man du san mi wani, dan mi o meki den koti yu noso wantron puru."
Tofruman Branco ben wani lafu ma a ori ensrefi. A taki: "Yu mu du san mi e taigi yu. Den tofru wortu san mi e taki e wroko siksi leisi nomo. Dati wani taki dat mi lespeki kownufrow Margreta kan winsi siksi tron san yu wani. Ma efu mi tiki broko bifo mi kba taki den tofruwortu, dati wani taki dati mi bigi basi abi mi fanowdu èn dan yu no o si mi moro."
Kownufrow taki: "Mi no abi trobi san yu e taki dape. Solanga mi de dya yu mu du san mi e taigi yu. So du san mi e taigi yu now. Meki mi noso kon moi."
Tofruman Branco taki: "Mi lespeki kownufrow Margreta, drai tnapu luku yusrefi ini a spikri, dan yu mu tapu yu ai. Sodra mi froiti, dan yu e opo yu ai."
Kownufrow Margreta opo tnapu e luku ini a spikri, dan a tapu en ai. Tofruman Branco opo en tofru tiki tapu kownufrow ede dan a taki: "Mi tiki, mi tiki, meki mi kownufrow noso kon moi." Dan a froiti.
Baka dati kownufrow Margreta opo en ai. A bigin lafu di a si taki en noso ben kon moi. Dan a taki: "Tofruman Branco, mi wani dati yu mu meki mi noso kon tu tron so moi."
Tofruman Branco du san kownufrow Margreta taki fu a di fu tu leisi. Baka dati di kownufrow si taki en noso ben kon tu tron so moi, a taigi tofruman Branco dati a mu du a sani disi ete fo leisi. Tofruman Branco du a srefi sani ete fo leisi. Dan baka dati kownufrow taki: "Ai, yu na wan bun tofruman. Ma now mi wani taki mi mus abi a moro moi noso ini her' grontapu."
Tofruman Branco skreki di a yere san kownufrow Margreta ben wani. A taki: "Mi kownufrow Margreta, mi no man du a sani di yu aksi mi now, bika den siksi winsi san yu aksi psa kba."
Kownufrow ati bron. A taki: "San! Mi o meki den srudati fu mi koti yu noso, dan den o diki yu ai puru. Bika yu no wani du san mi taigi yu." Dan kownufrow kari dri srudati fu en kon, a taki: "Un mu koti a man disi en noso, dan un diki en ai puru. Bika a weigri fu du san mi e taki. Baka dati un e trowe en ini a liba, meki den kaiman nyan en!"
Fa den srudati ben wani koti en noso puru, a bari taki: "Mi lespeki kownufrow Margreta, sari mi pôti wan. Mi sa du san yu aksi mi."
Kownufrow Margreta taki: "Un wakti. Meki a du san mi aksi en fosi. Dan baka dati un e du san mi taigi unu fu du!"
Dan tofruman Branco meki kownufrow Margreta tnapu baka fesi a spikri. A taki: "Spikri, spikri mi wani taki kownufrow Margreta mu abi a moro langa noso!" A froiti esesi, dan a broko en tofrutiki. Dan wantron so tofruman Branco no ben de fu si moro.
Kownufrow Margreta bari wan bun bigi b'bari di a opo en ai. A ben kisi wan bun langa noso now, èn en fesi ben kon takru. Den dri srudati nanga a kamrawentye lon gwe. Den tra wrokoman ben tnapu e luku so ferwondru.
Baka wan pisten den bigin yere fa sani ben naki e broko tapu a sodro, ma no wan fu den ben prefuru fu go luku. Baka wan pisten dan kownufrow Margreta lon kmoto ini a kamra nanga wan deigri ini en anu kon tapu a trapu. A bari: "Suma na a sma di tyari a tofruman kon dya?"
Di den trawan si kownufrow, den alamala bigin lon gwe e bari lafu.
Kownufrow bigin naki ala sani broko ini a oso. Dan a go ini en kamra go sidon fesi a spikri. A taki: "Na mi noso kon langa so!" Dan a bigin e bari lafu leki a no ben de bun na en ede. A no ben sabi san fu du moro. Baka wan pisten a sutu faya gi a heri oso. Let' na fesi en spikri a bron dede, tron asisi.