Fa Anansi meki Tigri tan na busi

Anansi nanga Tigri ben hori wan strei. Ala mamanten den bo naki densrefi wan kofu. Tide Anansi, tamara Tigri. A tori disi ben doro te na kownu srefi nanga den bigi bigi man fu a kondre. Ma kownu ben taki dat a sma di no man moro musu tan na busi fu ala ten.
Kownu ben wani fu den hari lot, ma Tigri ben taki: "No, un no abi fu hari lot. Meki Anansi fosi naki." Tigri ben prisiri. A prakseri taki a tranga moro Anansi so a mus fu wini. Ma Anansi no tranga, ma a koni.
Na so den bigin a strei. Tigri ben gi Anansi a okasi fu naki fosi. Bikasi a prakseri taki efu en naki fosi, dan fa a tranga so, Anansi no sa man naki en moro. A srefi dei Anansi ben go na wan wenkri fu go bai wan mokro. Di a go na oso, a poti a mokro na ondro en bedi dan a go sribi.
Fruku mamanten Anansi dyompo opo fu en bedi. A teki a mokro dan a gwe. Di a doro na Tigri oso, a naki a doro fu Tigri: bam, bam, bam. Fa Tigri opo a doro Anansi naki en wan mokro na en ede. Tigri bari, a fadon. Anansi go ferteri kownu fa a tori waka. Den wrokoman fu kownu ben skrifi ala sani na tapu papira.
Di Anansi de na pasi fu go na oso ai prakseri fa a sa man kisi Tigri. Na waka ai waka, a si Konkoni e kon. Anansi trowe ensrefi na gron, a bigin lolo na gron dan ai hori en bere. Di Konkoni si Anansi, a lon go, a taki: "Anansi, san psa nanga yu?"
Anansi piki nanga wan bun swaki sten: "Mi bere e hati mi. Yepi mi fu mi kan go na oso."
Na so Konkoni teki Anansi na en baka, dan a tyari en go na oso. Di den doro na oso, Anansi aksi Konkoni nanga wan swaki sten efu a kan sribi nanga en. Bikasi tamara mamanten wan man o tyari wan sani gi en, a no sabi efu a sa man opo. Konkoni taki: "A bun, mi sa sribi nanga yu."
Mamanten fruku, fosi dei opo, Anansi yere wan sma na tapu a prasi. A prakseri disi mus fu de Tigri. Ne a yere wan sma e naki a doro: bam, bam, bam. Anansi wiki Konkoni meki a opo go luku efu na a man. Konkoni dyompo opo. Fa a opo a doro, Tigri tyari wan slag kon so: wup. A naki Konkoni let' na en ede. Konkoni fadon dede.
Tigri prisiri! A lon go piki kownu taki a kiri Anansi. Di Anansi yere Tigri gwe, a opo, a teki a dedeskin fu Konkoni, dan a bori en. Di a kba nyan a go koiri na strati. Ala sma skreki di den si Anansi, bikasi ala sma ben denki dat Anansi dede. Tigri srefi skreki moro ala sma, bikasi a ben denki dat a kiri Anansi.
Now na Anansi ben mus naki baka. A opo fruku mamanten go na Tigri oso. Fa a naki a doro, Tigri kon. Anansi naki en wan mokro baka na en ede. Tigri bari! A fadon, a taki: "Ai, baya. Mi no sabi efu mi o man teki den slag fu a boi disi ete." Tigri no ben man opo. Anansi go piki kownu fa a tori waka. Den skrifi ala sani na tapu papira.
Now na Tigri ben mus naki. Di Anansi de ondro pasi fu go na oso, a si Dia e kon. Agen a trowe ensrefi na gron. A bigin lolo na gron e bari fu bere-ati. Dia si fa Anansi e lolo na gron, a taki: "Anansi, san psa nanga yu?"
Nanga swaki sten Anansi piki: "Mi bere e hati mi èn mi no man waka srefsrefi."
Dia taki: "We, na betre yu kon sidon na tapu mi baka dan mi sa tyari yu go na oso."
Di den doro na oso Anansi taki: "Dia, a moro betre yu tan nanga mi. Bikasi tamara mamanten wan man e go tyari wan sani gi mi èn mi no sabi efu mi sa man opo."
Dia taki: "A bun, mi sa tan nanga yu."
A neti dati den ben go fruku na bedi. Mus'dei mamanten Anansi ben yere wan sma na tapu a prasi. A ben sabi dat Tigri ben kon fu naki en. Ma a tan didon na tapu en bedi. Tigri naki a doro: bam, bam, bam. Ne Anansi wiki Dia fu go opo a doro. Fa Dia ben de na ini a sribi a skreki dan a lon go opo a doro. Fa a pusu en ede go na dorosei fu luku suma de drape, Tigri naki en wan slag na en ede. A fadon na gron. Tigri no luku srefsrefi leki a lon go taigi kownu dati a kiri Anansi. Di Tigri gwe Anansi opo, a teki a dedeskin fu Dia dan a bori en. Na so Anansi ben abi stimofo fu omeni dei.
Di Anansi kba nyan, a go psa na kownu mofodoro. Tigri bari di a si Anansi. A taki: "Mi no man ferstan a tori disi. So wan naki di mi naki a man, dan tog a man e libi ete?"
A tra dei ben de Anansi dei fu go naki Tigri. Anansi opo fruku mamanten. Di a doro, a naki a oso fu Tigri: bam, bam, bam. Tigri bigin begi Anansi, a taki: "Anansi, mi e begi yu no naki mi moro. Mi si dati mi no man nanga yu. Dati meki mi e begi yu nanga ala lespeki fu yu no naki mi. Mi si taki yu tranga èn na yu wini a feti."
Ne Tigri lon go na ini a busi te leki a dei fu tide. Èn Anansi ben wini a feti, so meki a de na ini oso te leki a dei fu tide.

Na a sma di diki wan olo gi wan trawan, na en srefi e fadon na ini


Anansi taki: "Mi musu suku wan fasi fu kon na nyanyan." Ne Anansi go na Gado, a taki: "Masra, meki a de so dati te wan sma lafu wan trawan, a musu fadon dede."
Ne Gado piki taki: "A bun. Te wan sma lafu wan trawan, a sa fadon dede."
Anansi prisiri nanga dati. A teki wan tyapu nanga wantu kasabatiki dan a kren go na tapu wan bergi. Ma a bergi ben abi soso ston. Anansi saka sidon te leki a si wan meti e kon. A dyompo opo a bigin krabu nanga a tyapu na tapu a ston: kram, kram, kram. Na so a tyapu e bari na tapu a ston. A meti taki: "We Anansi, san yu e du?"
Mati Anansi piki: "Na wantu kasabatiki mi wani prani."
A meti bigin lafu, a taki: "A no spotu yu e hori yusrefi?" Dan wantron so a meti fadon dede. Anansi teki a meti dan a tyari en go na en oso. Na so a ben abi stimofo fu wantu dei.
Di a stimofo kon kba Anansi go baka na tapu a bergi. A sidon wan heri pisten. Ma di a si wan meti e kon, a dyompo opo èn a bigin tyapu kram, kram, kram na tapu a ston. Di a meti kon krosbei, a taki: "Anansi, fa yu tan?"
Anansi piki: "We, mi mati, mi de bun." Dan Anansi e krabu go doro.
Ne a meti aksi Anansi taki: "San yu e du?"
Dan Anansi piki: "Na wantu kasabatiki mi wani prani."
Ne a meti bigin lafu, a taki: "Yu e hori yusrefi na spotu." Ne a meti fadon dede. Agen Anansi ben abi stimofo gi wantu dei. Na so Anansi meki a sani omeni tron.
Ma wan dei Anansi ben de na tapu a bergi baka. Ne Tingifowru e waka kon. A taki: "Mi mati Anansi, fa yu tan?"
Anansi piki taki: "We, mi de bun, yèrè." Na so den bigin taki tori. Ma Tingifowru no aksi Anansi san ai du. Di a kba taki tori dan a opo, a taki: "So, mi mati, mi o gwe."
Dan Anansi aksi en taki: "Pe yu e go so dan?"
Tingifowru piki taki: "Mi e go na barbier. Mi wani koti mi wiwiri."
Ne Anansi bigin lafu dat a fadon na tapu a gron, a taki: "Fa yu sa man koti yu edewiwiri? Yu ede piri. Na spotu yu e hori yusrefi. Yu heri ede krebi kba."
Dan baka di Anansi taki den wortu disi, a dede. A srefi sani di a ben winsi gi den trawan kon miti en. Na so wi e si dat a no bun fu winsi ogri gi trawan. Bikasi a ogri san yu e winsi gi wan trawan kan kon miti yu tu.

Libisma kefalèk

Yu ben abi tu mati, Anansi nanga Tigri. Den mati disi ben lobi densrefi so furu, dat' meki den ben du den srefi sani. Den ben waka e fufuru ala sei.
Dan wan bakadina, den tu man ben teki wan koiri. Dan den ben taki tori go, den ben taki tori kon. Ma dan Anansi bigin taki: "Yongu, libisma kefalèk, yèrè."
Tigri taki: "San yu taki?"
Anansi taki: "Libisma kefalèk."
Tigri taki: "Libisma kefalèk? Gi yu libisma kefalèk, ma no gi mi. We sori mi pe wan libisma de, dan yu sa si efu mi no nyan en."
Anansi taki: "Oké, tamara mamanten, fo yuru, dan yu mus kon na mi. Dan mi o sori yu wan libisma."
Tigri taki: "A bun." Dan den man prati pasi. Ibri wan fu den go na den oso.
A tamara mamanten fu en, Tigri no ben lati. Fo yuru a doro na Anansi oso. Anansi luku a tori. Anansi taki: "San! Yu doro na a yoisti yuru."
Tigri taki: "Ai, man. Nownow de, ala mi tifi faya. Ala mi tifi e puru smoko. San yu taki fu libisma, yu o si san mi o meki nanga libisma."
Anansi taki: "Wakti, man. Mi e waran pikinso te. Dan te mi kba dringi, dan wi e gwe."
Dan Anansi waran en te, dan a dringi. Dan di Anansi kba dringi en te, dan den gwe. Den bigin waka tapu wan pasi. Den waka, den waka. Den waka tee... Den waka te den feifi yuru ten. Ma dan feifi yuru a loktu e bigin e krin pikinso. Dan den si wan man e kon nanga wan tiki na en anu. A ben tinga tinga e kon.
Dan Tigri aksi Anansi taki: "Ei, a no wan libisma e kon drape?"
Anansi piki en taki: "No, man. Wakti, meki wi doro na en sei, dan mi o taigi yu efu na wan libisma e kon drape." A ten di den doro krosbei fu en, dan den si taki na wan bigiman e waka e kon.
Di Anansi si dati, a taigi Tigri taki: "No, man. A ben de wan libisma, ma now a no de wan libisma moro."
Tigri taki: "San, yongu!" Dan den man bigin waka go moro fara. Den taki tori go doro.
Dan di den waka wan pisi, Tigri aksi Anansi taki: "Yu no e si wan libisma ete, no?" Moro nanga moro a dei ben kon krin. Dan den si wan pikin e waka e kon. A ori wan sani na en anu. A ben go du wan boskopu.
Di Tigri si en, a aksi Anansi taki: "Ei, a no wan libisma e waka kon drape?"
Anansi taki: "Pe? Wakti! Meki wi go moro krosbei, dan wi sa si efu na wan libisma." Di den waka go moro krosbei, dan den si taki na wan pikin. Dan Anansi taki: "No man, a disi no doro wan libisma ete." So den waka go moro fara. A ten di den waka wan heri pisi, den si wan man e kon.
Dan a ten di den si a man e kon, dan Anansi taki: "Ai, disi na wan libisma." Dan Anansi lon go na busi, go kibri. A ten dati Tigri ben de so krasi, yèrè, taki nanga atibron a bigin lon go na a man tapu. Ma a no ben sabi taki a man ben de Ontiman. A ten di Ontiman si Tigri, a hari en gon, dan a ori en na en anu. Nanga atibron Tigri dyompo go na Ontiman tapu. Dan Ontiman sutu en wan schot. Dan Ontiman puru wan kapmes na en seibere. Dan a kapu Tigri tu kapu na en seibere. Dan Tigri lon gwe. Ma a gwe nanga skin-ati. A ben kan dede srefi.
Dan wan heri pisten baka di a sani disi psa, dan Anansi no ben si Tigri. Dan Anansi prakseri taki: "A sani di mi e si dya, dan Tigri dede. Ontiman kiri en. Mi ben warskow en taki libisma kefalèk, ma a no ben bribi." Ma dan a tan so, wan heri pisten a no si en. Dri mun psa kba di a no ben si en.
Dan wan dei na waka a ben e waka, fu en koloku a si Tigri. Anansi taki: "Mati Tigri, fa a psa?"
Tigri taki: "Man, yu ben taigi mi taki libisma kefalèk. Ai, a ten di mi wani dyompo, fu go na libisma tapu fu nyan en, dan a hari wan tiki nanga san a ben waka, dan a langa a tiki kon ini mi fesi, dan a bro wan faya kon na ini mi fesi. Ma dan a no ben kba ete, dan a hari wan krabnari fu en puru, dan a kapu mi nanga en na mi seibere. Luku mi sei dyaso, wan heri pisten mi no ben man waka. A san ben soro." A taki go moro fara taki: "Yu ben taigi mi taki libisma kefalèk. Now mi e si taki libisma kefalèk. Libisma a no wan sani fu yu meki spotu nanga en."
Tigri taigi Anansi moro fara taki, a faya di libisma bro ini en fesi, no kefalèk so, ma a krabnari fu en, di a hari, kapu en, dati a feni so kefalèk. Ai prakseri taki: "Fa a man du fu puru en krabnari, dan a kapu mi nanga en." Tigri taigi Anansi taki: "Libisma kefalèk. Ai, mi gi yu trutru leti taki libisma de wan kefalèk sortu sani."

Anansi kori Tigri

Ala sma sabi dati Anansi na wan lesi man. Anansi no lobi wroko. Ma koni dati a de. Na fu a koni fu en ai libi.
Wan dei a prakseri taki: "Fa mi e go libi?" Dan a go na Tigri fu go leni moni.
Dan Tigri taki: "Mi sa leni yu, ma pe mi mus kon teki mi moni?"
Dan Anansi piki taki: "Efu i kon na Kokosiko èn yu no si mi drape, dan mi de na Bankuman. Efu i kon drape èn i no si mi, dan mi de na Nyawtete. Èn efu mi no de drape, dan mi de na Wintiban."
Tigri no sabi den presi di Anansi e kari gi en. Ma Tigri de so don, a no aksi Anansi pe den presi de. Ma prefu dati Tigri e piki nomo taki: "Ai, Ba Anansi, mi sa kon."
Na so Anansi teki a moni dan a gwe. Ma na baka wan heri pisten, Tigri ben go suku Anansi, ma a no ben man feni en no wan presi. Na so Tigri opo go na oso go suku Anansi. Di Anansi si Tigri e kon, a lon go kibri. Dan Tigri si Ma Akuba, dan a aksi en efu Anansi no de.
Ma Akuba piki en taki: "We, didyonsno a ben de dya, ma a go na Kokosiko." Yongu, Tigri lon so, wup, sondro fu aksi Ma Akuba noti moro. Tigri lon. A no sabi pe a presi de, ma a lon te a kon weri. Di a no man moro a stop, a libi a sani.
Tigri wakti te baka wan tu wiki dan a go baka. Di ai kon dan Anansi si en dan a lon gi Tigri. Di Tigri doro dan a aksi Ma Akuba pe Anansi de. Ma Akuba taki: "No, Anansi no de. Didyonsno a ben de dya, ma a go na Nyawtete." Tigri no draidrai, ma a lon so wup. Ensrefi no sabi pe ai lon go, ma a lon te a weri. Tigri no sabi den presi, a no sabi noti, ma ai go suku Anansi. Na so Anansi meki a sani dri tron.
Ma a di fu fo tron di Tigri ben kon suku en, dan Anansi no ben si taki Tigri e kon. Di a ben si en dan a ben lati kba, a no ben abi no wan presi fu go kibri. Ma wan godo ben de na mofodoro, dan Anansi bari gi Ma Akuba nanga den pikin: "Un go ini a godo." Anansi srefi lon go so, wup, ini a godo. Dan Tigri kon èn a kari omeni leisi. Doro no tapu, fensre no tapu, ma no wan sma e piki. Tigri waka luku ma no wan sei sma de fu si. Tigri taki: "Mi no si no wan sma, ma a godo di de dya, mi o teki en tyari gwe."
Na so Tigri teki a godo. Ma now Tigri firi taki a godo hebi, ma fu si go ini a godo, dati a no ben man fu du. Dan a taki: "I sabi san mi o du? Mi o waka te leki mi si wan sma dan mi o aksi en fu luku a godo gi mi. Bikasi san mi e firi dyaso, a godo hebi. Wan sani musu de ini a godo. Mi no sabi san, ma mi o bron a godo disi."
Dan a waka tee... bam, a si Pratje. Pratje na wan fisi di den e kari Sidderaal. Tigri taki: "Pratje."
Dan Pratje piki: "Iya, mi Ba Tigri."
Dan a taki: "Yere, luku a godo gi mi. Mi e kon, mi e go suku udu."
Dan Pratje piki: "Iya, Ba Tigri." Dan so Ba Tigri gwe.
Ma fa a gwe, na so a kon nanga wan frak udu. Di a poti dati dan a lon gwe baka, bika a feni taki a musu meki wan bun bigi faya. Bikasi a sani di de na ini a godo no musu kmopo, a musu dede fosi. Dan a gwe baka a go suku titei.
Aite Anansi si dati Tigri gwe wan pisi, dan a kmopo na ini a godo nanga den pikin nanga Ma Akuba. Di den kmopo ini a godo Pratje bari taki: "Anansi, pe yu e go?"
Dan Anansi piki taki: "Sanede yu e aksi mi pe mi e go? San yu wani sabi?"
Dan Pratje piki en taki: "Ma mi mu luku a godo gi Ba Tigri."
Dan Anansi piki: "Mi mati, yu don, yèrè. Ba Tigri taki yu mu luku a godo, ma yu no mu luku Anansi."
Ne Pratje piki taki: "Ai, yu abi leti. A taigi mi fu luku a godo, ma no fu luku Anansi."
We, ne Anansi taki: "Yu mu luku a godo. Yu no mu luku mi." Dan Anansi gwe go kibri.
Di Tigri doro dan a meki a faya. We, a faya bigi tee... Dan Tigri waka go teki a godo. Aite a teki a godo a firi taki a godo lekti. Dan a aksi Pratje: "Pratje, den sani di ben de na ini a godo, pe den de?"
Ne Pratje piki taki: "A no sani ben de na ini a godo, na Ba Anansi ben de na ini a godo. Mi taigi en taki a no mu kmopo na ini a godo, bika mi tata ben taigi mi fu luku a godo. Ne Anansi piki mi taki efu yu taigi mi fu luku a godo, dan dati no wani taki dati mi musu luku en."
Ne Ba Tigri taki: "O, na so a taigi yu no? We, dan yu o go dede na Anansi presi."
Na so Tigri teki Pratje dan a fringi en go ini a faya. Ma now, fa Pratje na wan Sidderaal dan ai dyompo na ini a faya. Èn pe ai dyompo dan a faya e kiri drape. Ne Tigri snapu, ai luku a sani. A prakseri: "San, a boi musu fu feni wan bun na ini a faya. Bikasi, prefu a bron ai dyompo dyompo e dansi na ini a faya. We, mi ooktu sa go na ini a faya fu go luku san na a bun di a boi e feni na ini a faya."
Ne Tigri dyompo go na ini a faya. Aite Tigri dyompo go na ini a faya ala Tigri skin piri. En mofo, en noso nanga en anu ooktu. Na so Tigri bron dede na ini a faya. Ne Anansi saka kon, a taki: "We, mi o puru don gi Tigri. Gi mi en dyaso, mi sa tyari en go na mi oso." Na so Anansi tyari Tigri gwe go brabakoto. A no ben afu pai no wan paiman moro. Tigri dede. Dan so Anansi kon fri fu a paiman dati.

Fa Anansi kmopo na ini den paiman

Ala sma sabi dati Anansi no lobi wroko. Ma ensrefi taki te yu no lobi wroko yu mus koni. Èn koni dat a de fu tru.
Na so a ben de dati Anansi ben abi moni fanowdu. A go na Kakalaka, a leni moni. A go na Fowru, a leni moni. A go na Awari, a leni moni. A go na Tigri, a leni moni. A go na Ontiman, a leni moni. Anansi taigi alamala dati den mus kon teki den moni abra tu wiki. Èn tapu a srefi dei. Ma alamala a gi wan yuru psa den srefi. Dus efu a taigi Kakalaka fu kon erfu yuru, dan a taigi Fowru fu kon twarfu yuru. Na so Anansi ben abi wan heri ipi moni. A nyan a moni te leki a moni kon kba.
We now a dei doro fu den sma kon teki den moni. Fruku mamanten Anansi ben wiki. A taigi Ma Akuba fu krin a presi èn a taigi en ooktu fu poti wan beki nanga watra na ondro a bon na prasi. Na so Ma Akuba du san Anansi ben taigi en fu du.
Anansi sidon na oso dan a si Kakalaka e kon fu teki en moni. Anansi taki: "Mati Kakalaka fa yu tan? Kon doro."
Kakalaka piki: "Mi de bun. Ma fa fu yu dan?"
Anansi piki: "Mi de bun. Na moni yu kon teki?"
Kakalaka piki: "Ai, na a moni mi kon teki."
Anansi taki: "We, sidon pikinso. Dyonsno mi sa go teki en gi yu."
Na so den bigin gi tori te leki Kakalaka bigin bari: "Anansi, luku Fowru e kon! San mi mus du?"
Anansi taki: "We go esesi na ini a kukru. Te Fowru gwe mi sa kon piki yu." Na so Kakalaka lon go na ini a kukru.
Di Fowru doro a taki: "Anansi fa yu tan?"
Anansi piki: "Mi de bun, baya. Fa fu yu?"
Fowru piki: "We, ai go safrisafri."
Dan Anansi aksi en efu na a moni a kon teki. A taki: "Ai, na a moni mi kon teki."
Ne Anansi taki: "We, mek' un tak' tori pikinso. Mi sa go teki a moni dyonsno gi yu." Di den sidon wan pisi Anansi taki: "Mati Fowru, go luku na ini a kukru. Mi abi wan sani gi yu."
Fowru opo go na ini a kukru, dan a si Kakalaka. A prisiri! A grabu Kakalaka, dan a nyan en. Di a kba nyan en, a drai go na Anansi baka. Na so Anansi kmopo na ini wan paiman.
Di den sidon pikinso, Anansi taki: "Tan, a no Awari e kon drape?"
Ne Fowru dyompo, a taki: "Anansi, fa mi mus du? Efu Awari si mi, a sa nyan mi."
Anansi taki: "Go esesi na ini a kukru, dan te a gwe mi sa kari yu." Na so Fowru lon go kibri na ini a kukru.
Di Awari doro a taki: "Ai, mi mati Anansi, fa yu tan? Na wan heri pisten di mi no si yu."
Anansi taki: "We, mi mati, mi de bun èn mi breiti fu si yu. Mi sabi dati yu kon fu a moni, ma meki wi taki pikinso dan te un kba mi sa teki en gi yu."
Di den sidon wan pisi Anansi taigi Awari meki a go na ini a kukru, a abi wan sani gi en drape. Di Awari doro, a si dat na Fowru. A prisiri, a nyan a fowru dan a drai go sidon baka. Na so Anansi kmopo na ini a paiman dati.
A no ben sidon langa di a si Tigri e kon. A bari: "Anansi, luku suma e kon! Na mi bigi feyanti e kon drape. Yu wawan kan yepi mi. San mi mus du?"
Ne Anansi taki: "Go na ini a kukru. Tan drape te a gwe. Mi sa kari yu." Awari lon go gawgaw na ini a kukru.
Tigri doro, a taki: "Ai, Anansi, fa fu libi?"
Anansi piki taki: "Mi mati, yu sabi fa a libi tranga. Ala sani kon diri. Ma yu no abi fu frede, mi abi yu moni gi yu." Fa Tigri saka sidon, Anansi taki: "Mi mati, go na ini a kukru, mi abi wan sani gi yu drape. Bikasi mi sabi san yu lobi."
Tigri lon go na ini a kukru. Di a si Awari, a prisiri! A no draidrai, a grabu Awari, dan a nyan en wantron. Now Anansi komopo na ini dri paiman. Tigri drai kon sidon, a taki: "Ai, mati Anansi, yu gi mi wan bun sani." Dan den bigin taki tori. Ma den no ben taki langa srefi, ne Tigri dyompo opo. A bigin bari: "Anansi, Anansi, luku! Ontiman e kon! Efu a si mi, ai go sutu mi kiri."
Anansi taki: "No frede! Kren go ini a bon. Te a gwe, mi sa kari yu." Na so Tigri kren go ini a bon.
Di Ontiman doro, a taki: "Anansi, fa?"
Anansi taki: "Ai go safrisafri." Dan a taki: "Ontiman, fa fu yu dan?"
Ontiman piki: "Anansi, a no e go. Mi waka heri dei, ma not'noti mi feni."
Anansi taki: "Sidon pikinso, meki un taki abra a libi. Te un kba, mi sa go teki a moni gi yu, bikasi mi sabi dati na a moni yu kon teki."
Ma Ontiman no ben wani wakti, so a taki: "Mi no abi someni ten. Mi musu waka fara ete èn a son faya. Luku fa mi e sweti."
Ne Anansi piki: "Go na ondro a bon. Mi abi wan beki nanga watra drape, dan yu kan wasi yu fesi."
Di Ontiman go fu wasi en fesi, a si a prentyi fu Tigri na ini a watra. Ontiman no draidrai leki a grabu en gon, a sutu Tigri wantron. Tigri fadon dede. Ontiman prisiri sote, a lon go na Anansi, a taki: "Anansi, yu no abi fu pai mi moro. Bikasi mi feni wan sani di warti moro a heri moni di yu musu pai mi."
Ontiman prisiri. A teki Tigri, dan a gwe. Na so Anansi kmopo na ini ala den paiman fu en.