Te yu e nyan, yu mu panya yu finga

Fosten Baas Lando ben de driktoro fu wan pranasi. A ben abi tu frow na foto, frow Lène nanga frow Lena. Dan ala sani san a ben feni ini a pranasi a ben e tyari gi den frow te a ben kon na foto. Ma ala leisi a ben taigi den taki: "Te un e nyan dan un mus panya un finga."
A fosi frow, frow Lène, no ben sabi san dati ben wani taki. Ma a tra frow, frow Lena ben sabi taki te Baas Lando ben tyari sani kon dan a ben mu prati nanga trawan.
So, te frow Lène ben kba bori te bakadina, a ben e go sidon na dorosei e panya en finga gi loktu te ai nyan. Dan a e taki: "Baas Lando taki dati te mi e nyan, mi mus panya mi finga." Awinsi Baas Lando ben tyari furu agumeti nanga batyaw kon, frow Lène ben sidon e nyan ala sani en wawan. Ma frow Lena ben e prati afu gi tra sma.
Ma baka wan pis'ten Baas Lando kon dede. Den tu frow bari sote di den yere taki den masra dede. Baka di den beri en, no wan sma ben e luku frow Lène a wan ai. Frow Lène ben sidon e luku fa furu sma ben e tyari sani kon gi frow Lena. Trawan ben tyari sukru, sowtu, fowru, kakaw, te, kofi nanga oli. Dan wan dei frow Lène go na frow Lena, a taki: "Baya, sensi Baas Lando dede, mi e pina. Ma luku yu! Ala sma san e kon e tyari wan sani kon gi yu."
Dan frow Lena piki frow Lène taki: "Di Baas Lando ben e tyari sani kon gi yu, san yu ben du nanga den sani?"
Frow Lène taki: "Mi wawan ben e nyan ala sani."
Dan frow Lena taki: "Di Baas Lando taigi yu taki te yu e nyan dan yu mus panya yu finga, san yu du dan?"
Frow Lène piki en taki: "Te mi ben e nyan, dan mi ben e panya mi finga na loktu so."
Frow Lena lafu. A taki: "So, dan loktu mus gi yu nyanyan. Bika na gi loktu yu ben e panya yu finga. Ma mi dati, te mi ben e nyan dan mi ben e prati nanga trawan. So yu e si taki na fu trawan mi e nyan now." Fu syen frow Lène opo safri, a gwe.
A odo disi e sori unu taki, te wi e nyan wi no mu ori ala sani gi wisrefi. Ma un mu gi trawan. Dan te wan dei doro taki yusrefi no abi, dan trawan o gi yu baka. "Te yu e nyan, yu mu panya yu finga."